Qazaqstanda 2026 jylǵy 11 qazannan bastap baılanys operatorlarynyń kıberqaýipsizdik ınsıdentterin anyqtaý kezindegi áreketterin retteıtin jańa erejeler kúshine enedi. Keıbir jaǵdaılarda abonentke aldymen qaýipti joıý týraly SMS jiberiledi, al másele 48 saǵat ishinde sheshilmese, operator qurylǵynyń ınternetke qosylýyn shekteı alady, dep habarlaıdy infohub.kz saıty.
Naqty negizder men áreket tártibi jańa normatıvtik qujatpen aıqyndalady. Tolyq talaptar Qazaqstan Respýblıkasy Jasandy ıntellekt jáne sıfrlyq damý mınıstrliginiń 2026 jylǵy 24 qyrkúıektegi № 569/NQ buıryǵynda jarıalanǵan. Jańa tártip 2026 jylǵy 11 qazannan bastap qoldanysqa enedi.
Qujatqa sáıkes, baılanys qyzmetterin toqtata turý máselesin qaraýdyń negizi — baılanys jelileriniń jumysyn buzatyn ne kıberqaýipsizdikke qaýip tóndiretin ınsıdent týraly aqparat.
Mundaı málimetter kıberqaýipsizdikti qamtamasyz etý ortalyǵynan nemese Kıberqaýipsizdiktiń ulttyq úılestirý ortalyǵynan (KUÚO) kelýi múmkin.
Kıberqaýipsizdikti qamtamasyz etý ortalyqtary jelilerge táýlik boıy monıtorıń júrgizýge mindetti. Insıdent anyqtalsa, KUÚO tıisti aqparatty 24 saǵat ishinde baılanys operatoryna jáne kıberqaýipsizdikti qamtamasyz etý ortalyǵyna jiberedi.
Sonymen qatar ınternetke qosylýdy shekteý úshin abonentpen ózara is-qımyldyń belgili bir tártibi qarastyrylǵan.
Baılanys operatory abonenttik qurylǵynyń ınternetke qosylýyn eki jaǵdaıda shekteýge mindetti:
Birinshisi — abonent operator anyqtaǵan, qyzmetterdi toqtata turýǵa negiz bolatyn ınsıdentterdi joımasa.
Ekinshisi — operator KUÚO-dan nemese den qoıý qyzmetterinen asa mańyzdy sıfrlyq obektilerge qaýip tóndiretin ınsıdentter týraly aqparat alsa.
Qosylýdy shekteýdiń aldynda abonentke anyqtalǵan ınsıdentti joıý týraly SMS-habarlama jiberilýge tıis. Habarlama jiberilgennen keıin paıdalanýshyǵa máseleni sheshý úshin 48 saǵat beriledi.
Osy merzim ótken soń ınsıdent joıylmasa, operator ınternetke qosylýdy shekteı alady.
Osylaısha, jańa erejeler qaýip anyqtalǵan soń paıdalanýshyny birden ajyratýdy emes, kezeń-kezeńimen júrgiziletin tártipti kózdeıdi: ınsıdentti anyqtaý, abonentti habardar etý jáne oǵan máseleni sheshý úshin 48 saǵat berý.