2025 jyldyń qorytyndysy boıynsha «Qazaqstan-Qytaı qubyry» (QQQ) kompanıasynyń taza paıdasy 26%-ǵa tómendep, 27 mlrd teńgeni qurady. Bul ótken jylǵy 36,5 mlrd teńgeden aıtarlyqtaı az. Kompanıa Atasý – Alashankoý jáne Kenkıaq – Qumkól munaı qubyrlarynyń operatory bolyp tabylady, dep habarlaıdy infohub.kz.
Kompanıanyń tabysy da 13,3%-ǵa azaıyp, 87,9 mlrd teńgeden 76,2 mlrd teńgege deıin tómendedi. Operasıalyq paıda 43,4 mlrd teńgeden 29,2 mlrd teńgege deıin qysqardy. Al qarjylyq kirister eki eseden astam ósip, 2024 jylǵy 3,2 mlrd teńgeden 6,4 mlrd teńgege jetti.
QQQ teń dárejede ulttyq operator «QazTransOıl» men qytaılyq CNODC kompanıasyna tıesili. Dál osy CNODC 2025 jyldan bastap energetıka mınıstrliginiń buıryǵyn sotta daýlap keledi. Bul buıryq Reseı munaıyn Qazaqstan arqyly Qytaıǵa tasymaldaý tarıfterin ózgertken.
2025 jyldyń 1 mamyrynan bastap Atasý – Alashankoý ýchaskesindegi tarıf tonnasyna 10,77 dollardan 7,76 dollarǵa deıin (QQS-syz) tómendetildi. Energy Monitor Telegram-arnasynyń málimetinshe, osy sheshimniń saldarynan QQQ jylyna shamamen 30 mln dollar tabys tappaı qalýy múmkin, onyń shamamen 15 mln dollary qytaılyq aksıonerdiń úlesine tıedi.
2025 jyldyń shildesinde CNODC Energetıka mınıstrliginiń buıryǵyn jaramsyz dep tanýdy sottan suraǵan, alaıda talap qaıtaryldy. Sodan keıin kompanıa mınıstrliktiń áreketterine qarsy jańa ótinishter berdi. 2026 jyldyń aqpanynda sot CNODC talaptaryn ishinara qanaǵattandyryp, Energetıka mınıstrligin tarıfti qaıta qaraýǵa baılanysty materıaldardy kompanıaǵa usynýǵa mindettedi.
Keıin qytaı tarapy Energetıka mınıstrliginiń buıryǵyn kúshin joıýdy talap etip, qaıtadan sotqa júgindi. İske úshinshi tulǵa retinde «QazTransOıl» men QQQ tartyldy.
Qubyr kompanıasynyń eseptiliginde atap ótilgendeı, qazirgi ýaqytta CNODC men Energetıka mınıstrligi arasynda taraptardy tatýlastyrý týraly kelisim jobasyn kelisý rásimderi júrip jatyr. Osy jyldyq qarjylyq eseptilik bekitilgen kúnge deıin sot isiniń nátıjesi belgisiz.