Qazaqstandyqtar Malaızıaǵa kirý kezinde jıi bas tartýǵa tap bolýda. Sebepterin QR Syrtqy ister mınıstrliginiń resmı ókili Janbolat Ýsenov aıtyp berdi, dep habarlaıdy infohub.kz saıty.

Janbolat Ýsenovtiń aıtýynsha, Qazaqstan azamattarynyń Malaızıaǵa kirýine jıi bas tartý vızasyz rejım sharttaryn saqtamaýmen baılanysty. Ol qazaqstandyqtar týrısik maqsatta Malaızıada vızasyz 30 kúnge deıin bola alatynyn eske saldy.

«Degenmen, keıbir azamattar bul rejımniń sharttaryn buzyp, elge uzaq merzimge nemese ózge maqsattarmen, onyń ishinde qysqa merzimdi oqý kýrstarynan ótý nemese emdelý úshin kiredi», — dedi QR SİM resmı ókili.

Ol 30 kúndik merzimdi aınalyp ótý úshin «vızaran» (visa run) dep atalatyn ádis qoldanylatynyn aıtty: bul — kórshi memleketke qysqa ýaqytqa shyǵyp, 30 kúndik merzimdi jańartý úshin Malaızıaǵa dereý qaıta oralý.

«Elde bolý merzimin uzartýdyń mundaı tásili eldiń ımıgrasıalyq zańnamasyn buzý bolyp tabylatynyn jáne elge qaıta kirýge kepildik bermeıtinin eskertemiz. Bıyl Malaızıa bıligi shekaralyq baqylaýdy kúsheıtti. Shetel azamatyn el aýmaǵyna kirgizý týraly sheshimdi Malaızıanyń ımıgrasıalyq organdary tikeleı pasporttyq baqylaýdan ótý kezinde qabyldaıdy. „Vızaran“ jasaý áreketi kezinde azamat ustalyp, áýejaıdaǵy ımıgrasıalyq ortalyqqa ornalastyrylyp, keıin Malaızıadan deportasıalanýy múmkin», — dep eskertti Ýsenov.

QR SİM azamattardy vızasyz bolýdyń belgilengen merzimderi men sharttaryn qatań saqtaýǵa, ımıgrasıalyq talaptardy aldyn ala naqtylaýǵa jáne sapar maqsatyn eskerýge shaqyrady.

«Imıgrasıalyq baqylaýdan ótý kezinde sapardyń naqty maqsatyn kórsetý jáne zańdy bolýdyń belgilengen merzimderi ishinde elden keıingi ushýǵa aldyn ala satyp alynǵan áýebıletterdi, sondaı-aq sapardyń maqsatyn, ornyn jáne boljamdy merzimin rastaıtyn qujattardy ózińizde mindetti túrde bolýy qajet», — dedi vedomstvo ókili.

Janbolat Ýsenov tildik jáne ózge de bilim berý baǵdarlamalarynan ótý úshin balalarmen shetelge shyǵatyn azamattarǵa erekshe nazar aýdarý kerektigin atap ótti, óıtkeni bul tıisti ruqsattardy resimdeýdi talap etýi múmkin.