2026 jyldyń jeti aıynda Qazaqstanda bilim berý uıymdarynda tamaqtan ýlanýdyń nebári eki jaǵdaıy tirkeldi. Ótken jyldyń osy kezeńinde segiz jaǵdaı bolǵan edi. Densaýlyq saqtaý mınıstrliginiń málimetinshe, zardap shekken balalar sany 118-den 13-ke deıin azaıǵan. Vedomstvo muny memlekettik baqylaýdyń kúsheıýimen jáne mekteptegi tamaqtandyrýǵa qoıylatyn jańa talaptarmen baılanystyrady, dep habarlaıdy infohub.kz.
Mańǵystaý oblysynda oqýshylardyń jappaı ýlanýy rezonans týdyrǵannan keıin bılik birneshe mańyzdy shara qabyldady. Sonyń ishinde sanıtarlyq-epıdemıologıalyq qyzmetke buzýshylyqtardy jedel anyqtaýǵa múmkindik beretin tekserýlerdiń arnaıy tártibi bar.
Sonymen qatar, salaýatty jáne teńgerimdi rasıon qaǵıdattaryn eskere otyryp ázirlengen jańa tamaqtandyrý standarty engizildi. Ol ótken jyldyń 1 qyrkúıeginen bastap qoldanysqa endi. Sondaı-aq mektep asqanalarynda ónimderge, olardy tasymaldaý, saqtaý jáne taǵam daıyndaý jaǵdaılaryna baqylaý kúsheıtildi.
«Qabyldanǵan sharalardyń nátıjesinde 2026 jyldyń jeti aıynda bilim berý nysandarymen baılanysty tamaqtan ýlanýdyń tirkelgen jaǵdaılary tórt ese azaıdy», – dep atap ótti Densaýlyq saqtaý mınıstrliginde.
Eske salaıyq, shilde aıynyń basynda «Kýrsıv» Aqmola oblysynda kámeletke tolmaǵandar arasynda tamaqtan ýlaný jaǵdaıy tirkelgenin jazǵan bolatyn. Túnde Kókshetaýdaǵy oblystyq kópbeıindi balalar aýrýhanasyna jedel járdemmen tórt bala jetkizilgeni habarlanǵan.
Buǵan deıin Borovoe kentindegi T. Ýálıev atyndaǵy «Jaqsy №2» sport mektebinde jappaı ýlaný bolǵany habarlanǵan. Sonda Qostanaı men Almatydan jarysqa kelgen 18 bala ýlanǵan edi.