Qazaqstan Úkimeti psıhıkalyq densaýlyqty qorǵaý júıesindegi aýqymdy reformany jarıalady. 2027–2030 jyldarǵa arnalǵan jańa keshendi jospar saldardy emdeýden profılaktıkaǵa, erte anyqtaýǵa jáne barlyq kezeńderde súıemeldeýge kóshýdi kózdeıdi, dep habarlaıdy infohub.kz saıty.
Jobany Úkimette vıse-premer – Mádenıet jáne aqparat mınıstri Aıda Balaevanyń tóraǵalyǵymen ótken keńeste qarastyrdy.
Densaýlyq saqtaý mınıstri Aqmaral Álnazarova: «Búginde mamandandyrylǵan kómekti eki respýblıkalyq klınıka, 20 óńirlik psıhıkalyq densaýlyq ortalyǵy, 98 alǵashqy medısınalyq kómek ortalyǵy jáne aýyldyq jerlerdegi 200-den astam psıhıkalyq densaýlyq kabıneti kórsetedi. Júrgizilgen taldaý qyzmetti odan ári damytý qajettigin kórsetti. Jańa keshendi jospar psıhıkalyq densaýlyq mamandaryn emhanalar jumysyna ıntegrasıalaýdy, erte dıagnostıkany damytýdy, pasıenttiń marshrýtyn sıfrlandyrýdy, kadrlyq áleýetti nyǵaıtýdy jáne ınfraqurylymdy jańartýdy kózdeıdi. Balalar men jasóspirimderge erekshe nazar aýdarylady», – dedi.
Jospardy ázirleý aıasynda salalyq vedomstvolar ǵylymı zertteýlerdi damytý, mamandar daıarlaýdy jetildirý, bilim berý baǵdarlamalaryn jańartý, pedagogtar men psıhologtardyń biliktiligin arttyrý, sondaı-aq múgedektigi bar balalar men eresekterge arnalǵan arnaýly áleýmettik qyzmetter men ınfraqurylym júıesin odan ári damytý boıynsha usynystar berdi.
Mınıstrlikter men ákimdikterdiń baıandamalarynan keıin 2027–2030 jyldarǵa arnalǵan psıhıkalyq densaýlyqty qorǵaýdyń keshendi jospary bekitildi.