Qazaqstan Energetıka mınıstrligi kómirsýtekter boıynsha jer qoınaýyn paıdalaný quqyǵyn berýge arnalǵan elektrondyq aýksıon ótkizetinin habarlady. Saýda-sattyq 25 jeltoqsanǵa belgilenip, eQazyna alańynda ótedi, ótinimderdi qabyldaý 18 qarashada aıaqtalady. Aldaǵy saýdaǵa 2026 jyldyń sońyna deıin satýǵa josparlanǵan 112 ýchaskeniń 56-sy shyǵarylyp otyr, dep jazady infohub.kz saıty.
Munaı-gaz bloktary Qazaqstannyń batysynda, sondaı-aq Mańǵystaý, Aqtóbe, Atyraý, Ulytaý, Qostanaı jáne Qyzylorda oblystarynda ornalasqan. Memleket barlaý men óndirýge de, tikeleı kómirsýtek óndirýge de quqyqty satýda.
Bekitilgen tizimge Begimbet 1, Batys Ulytaý, Sholaqsaı, Basqumaq, Qarasý, Jasqaırat, Ústirt ýchaskeleriniń toby, Qosaral, Maılykól, Qaraqamys jáne Qarakól ýchaskeleri endi.
Jer qoınaýyn paıdalaný quqyǵyn alý bızneske qoıylatyn talaptarmen ushtasady. Aýksıon jeńimpazdary kelisimshart jasalǵan sátten bastap bir jyl ishinde barlaý jumystarynyń jobasyn daıyndaýǵa mindetti. Úsh jyl ishinde ınvestorlar eki ólshemdi seısmobarlaý talaptaryn oryndaýy, al tórt jyl ishinde keminde bir uńǵyma burǵylaýy tıis.
Óndirý kezeńinde kompanıalar ótken jylǵy shyǵynnyń 1%-yn jergilikti kadrlardy oqytýǵa, 1%-yn ǵylymı zertteýlerdi qarjylandyrýǵa jáne taǵy 1%-yn kelisimshart boıynsha ınvestısıadan ózderi jumys istep jatqan aımaqtyń áleýmettik-ekonomıkalyq damýyna jumsaýǵa mindetti.
Kelisimsharttarda ishki qundylyqtyń qatań kvotalary jazylǵan. Jergilikti úles jumystarda keminde 70%, qyzmetterde 70%, taýarlardy satyp alýda 30% bolýy kerek. Kásiporyndardyń basqarýshy quramy 80% qazaqstandyq mamandardan, qurylymdyq bólimshe jetekshileriniń quramy 90%, al tehnıkalyq mamandar men bilikti jumysshylar shtaty 100% quraýǵa mindetti.
Qory 100 mln tonnadan astam munaı nemese 50 mlrd tekshe metr tabıǵı gaz bolatyn iri jobalar úshin qosymsha mindettemeler qarastyrylǵan. Investor jańa óńdeý qýattaryn qurýǵa nemese qoldanystaǵylaryn jańǵyrtýǵa, ne óndirilgen shıkizatty ishki óńdeýge jiberýge mindetti bolady.
Aǵymdaǵy jyldyń shildesinde Energetıka mınıstrligi adal emes jer qoınaýyn paıdalanýshylardan qaryzdy sot tártibimen óndirýge nıetti ekenin málimdedi. Vedomstvo kelisimsharttar boıynsha qarjylyq mindettemelerdiń oryndalýyn tekserý jumysyn belsendi bastady.
Qyrkúıekte qatty paıdaly qazbalardy óndirýge jańa roıaltı engizý merziminiń shegerilgeni belgili boldy. Bastapqyda bul fıskaldyq quraldy jaqyn arada engizý josparlanǵan, alaıda úkimet shıkizat salasyna túsetin júktemeni neǵurlym egjeı-tegjeıli pysyqtaý úshin reformany 2029 jylǵa shegerýge sheshim qabyldady.