OPEK+ quramyndaǵy jeti el qazan aıynda munaı óndirý kólemin qyrkúıektegi jospar deńgeıinde saqtaý týraly sheshim qabyldady. Bul týraly 6 qyrkúıekte ótken vırtýaldy kezdesýde belgili boldy, dep habarlaıdy uıymnyń saıty.
Kezdesýge Saýd Arabıasy, Reseı, Irak, Kýveıt, Qazaqstan, Aljır jáne Oman ókilderi qatysty. Buǵan deıin bul elder 2023 jyldyń sáýirinde jáne qarashasynda qosymsha erikti túzetýler jasaıtyndaryn málimdegen bolatyn.
«6 qyrkúıekte OPEK+ quramyndaǵy jeti el — Saýd Arabıasy, Reseı, Irak, Kýveıt, Qazaqstan, Aljır jáne Oman — álemdik naryqtyń jaı-kúıi men damý perspektıvalaryn talqylaý úshin vırtýaldy kezdesý ótkizdi. Jeti el 2026 jylǵy qyrkúıektegi jospardy oryndaý úshin qajetti óndiris kólemin qazan aıynda saqtaý týraly sheshim qabyldady», — delingen habarlamada.
Osylaısha, qazan aıynda kelisimge qatysýshylar qyrkúıektegi josparda kózdelgen óndiris deńgeıin ustanýdy jalǵastyrady.
Qyrkúıekte Qazaqstan munaı óndirýdi tamyzben salystyrǵanda táýligine 10 myń barelge arttyrdy. Óndiris kólemi táýligine 1,628 mln bareldi qurady.
Jeti memleket yntymaqtastyq týraly deklarasıany tolyq saqtaýǵa ujymdyq mindettemelerin rastady. Qatysýshylar álemdik munaı naryǵynyń jaı-kúıi men perspektıvalaryn baǵalaý úshin aı saıyn kezdesýler ótkizýdi jalǵastyrady. OPEK+ quramyndaǵy jeti eldiń kelesi kezdesýi 4 qazanǵa josparlanǵan.