Qazaqstan quramasy halyqaralyq pándik olımpıadalarǵa qatysý tarıhyndaǵy eń úzdik nátıjelerdiń birin kórsetti. Elimizdiń jas ǵalymdary bıologıa jáne hımıa boıynsha iri álemdik jarystarda jeti medal jeńip aldy, dep habarlaıdy infohub.kz saıty.
12-19 shilde aralyǵynda Vılnúste (Lıtva) ótken 37-shi Halyqaralyq bıologıa olımpıadasynda (IBO-2026) Qazaqstan quramasy úsh kúmis jáne bir qola medal aldy. Bul nátıje 1996 jyly qol jetkizilgen ulttyq komandanyń úzdik jetistigin qaıtalaý boldy. Olımpıadaǵa 84 elden 330-tan astam oqýshy qatysty, olar kúrdeli teorıalyq tapsyrmalardy sheship, zerthanalyq praktıkýmdardy oryndady.
Kúmis medaldardy: Qaıyrken Ersultan (11 synyp, Pavlodar oblysynyń daryndy uldarǵa arnalǵan «Bilim-ınnovasıa» lıseı-ınternaty), Ashırhanov Álıhan (9 synyp, Almaty qalasynyń mamandandyrylǵan «Bilim-ınnovasıa» lıseı-ınternaty), Jeltova Sofá (11 synyp, Almaty-Medeý NIS) jeńip aldy. Qola medaldy Mejenına Evgenıa (11 synyp, Qaraǵandy qalasyndaǵy NIS) aldy. Komandanyń jattyqtyrýshylary men jetekshileri Láılá Askarova, Ilás Sakımov, Kamılá Sadykova jáne Dinmuhammed Urazbaev boldy.
Qazaqstandyq oqýshylar Tashkentte (Ózbekstan) ótken Halyqaralyq hımıa olımpıadasynda (IChO-2026) kem emes áserli nátıje kórsetti. Tórt qatysýshynyń bári júldeger atandy: bir altyn jáne úsh kúmis medal. Altyndy Óskemen qalasyndaǵy NIS oqýshysy Jeńisqanova Aızere (11 synyp) aldy. Kúmis júldegerler: Astana qalasy Nura aýdanyndaǵy NIS oqýshysy Kalı Ábilmansur (11 synyp), Almaty qalasyndaǵy №134 lıseı oqýshysy Poletaev Danıl (11 synyp), Astana qalasyndaǵy Spectrum International School oqýshysy Jaqsylyqov Ansar (11 synyp). Hımıa olımpıadasyna 90-nan astam elden 350-den astam oqýshy qatysty, jarys teorıalyq jáne praktıkalyq kezeńderden turdy.