18 shildede Qazaqstannyń úsh óńirinde – Aqmola, Shyǵys Qazaqstan jáne Pavlodar (Baıanaýyl ulttyq parki) oblystarynda orman órtteri shyqty, dep habarlaıdy infohub.kz.
Órt oshaqtaryn tabý jáne sóndirýge memlekettik orman qorǵaý qyzmetkerleri, sondaı-aq «Qazavıaormanqorǵaý» respýblıkalyq memlekettik kásipornynyń kúshi men quraldary jumyldyryldy. Qajet bolǵan jaǵdaıda Tótenshe jaǵdaılar mınıstrliginiń bólimsheleri qosylady.
16 shildede bastalǵan «Semeı ormany» memlekettik orman tabıǵı rezervatyndaǵy orman órti 18 shilde tańerteń oqshaýlandy. Sóndirý barysynda tikushaqtar 319 ret sý shashyp, órt oshaǵyna barlyǵy 709 tonna sý jetkizdi.
Ashyq janý 17 shildede joıyldy. Qazir qutqarýshylar jekelegen tútindegen oshaqtardy joıý jumystaryn jalǵastyrýda.