Qazaqstan Qytaı tarapynyń qazaqstandyq astyq pen maıly daqyldardy, onyń ishinde strategıalyq qor qalyptastyrý úshin satyp alý kólemin arttyrýdy usyndy, dep habarlaıdy infohub.kz saıty.
Aýyl sharýashylyǵy mınıstrliginde habarlaǵandaı, bul másele vıse-mınıstr Nazgúl Hatepovanyń QHR Memlekettik azyq-túlik jáne materıaldyq rezervter basqarmasynyń basshysy Lú Hýansınmen kezdesýinde talqylandy. İs-shara Qazaqstannyń 8-shi Qytaı astyq saýdasy konferensıasyna qatysýy aıasynda ótti.
2025 jyldyń qorytyndysy boıynsha eki el arasyndaǵy agroónerkásip kesheni ónimderiniń taýar aınalymy 36,8%-ǵa ósip, 1,97 mıllıard AQSh dollaryna jetti.
«Qytaı — Qazaqstannyń AÓK salasyndaǵy negizgi strategıalyq seriktesteriniń biri. Geografıalyq jaqyndyq, ekonomıkalardyń ózara tolyqtyrylýy jáne azyq-túlikke suranystyń turaqty ósýi ózara tıimdi yntymaqtastyqty odan ári keńeıtýge berik negiz qalaıdy», — dep atap ótti Nazgúl Hatepova.
Qazaqstan tarapy sondaı-aq ózara jetkizilimder tizbesin keńeıtýdi usyndy. Kelissózder barysynda aýyl sharýashylyǵy ónimderin saqtaý jáne qaıta óńdeý qýattaryn salýǵa qytaılyq ınvestısıalardy tartý perspektıvalary, sondaı-aq agrologıstıkany damytý máseleleri talqylandy.
Kezdesý qorytyndysy boıynsha taraptar usynystar boıynsha birlesken jumysty jalǵastyrýǵa jáne eki eldiń tıisti memlekettik organdary men isker toptary arasyndaǵy ózara is-qımyldy jandandyrýǵa kelisti.
Sonymen qatar, Nazgúl Hatepova Qytaıdyń Hýnan provınsıasynyń gýbernatory Mao Veımınmen kezdesý ótkizip, onda azyq-túlik qaýipsizdigi salasyndaǵy yntymaqtastyqty damytý máseleleri talqylandy. Qytaı tarapy Qazaqstan men Hýnan provınsıasy arasyndaǵy ǵylymı-tehnıkalyq ózara is-qımyldy keńeıtý jáne tájirıbe almasýdy usyndy.
Buǵan deıin Prezıdent Qasym-Jomart Toqaev Qazaqstan men Qytaı arasyndaǵy yntymaqtastyqtyń negizgi baǵyttaryn belgilegen bolatyn.