Qazaqstan óz aýmaǵynda shetel memleketteriniń derekterin ornalastyrýǵa múmkindik beretin aýqymdy jobany júzege asyrýǵa daıyndalýda, dep habarlaıdy infohub.kz.
Premer-mınıstr Oljas Bektenov Pavlodar oblysyndaǵy «Derekterdi óńdeý ortalyqtary alqaby» (Data Center Valley) jobasynyń iske asý qarqynyna arnalǵan keńes ótkizdi. Qazirgi ýaqytta qýaty 50 MVt bolatyn alǵashqy nysannyń qurylysy belsendi kezeńde. Jyl sońyna deıin derekter ortalyǵy men energobloktardyń negizgi korpýstaryn, ákimshilik-turmystyq keshendi, baqylaý-ótkizý pýnktterin jáne syrtqy ınjenerlik jelilerdiń bir bóligin salý josparlanýda. İske qosý jumystary 2027 jyldyń mamyrynda aıaqtalyp, nysan 2027 jyldyń maýsymynda paıdalanýǵa beriledi.
Úkimettiń málimetinshe, bul joba halyqaralyq gıperskeılerlerdiń derekterdi óńdeý ortalyqtaryn, AI-fabrıkalardy, GPU-klasterlerdi jáne bulttyq platformalardy ornalastyrýǵa arnalǵan masshtabtalatyn alań bolyp tabylady. Ony iske asyrý Qazaqstanda sıfrlyq ekonomıkanyń eksportqa baǵyttalǵan jańa sektoryn quryp, otandyq jasandy ıntellekt sheshimderin ázirleýge arnalǵan IT-ınfraqurylymdy qamtamasyz etedi.
«Data Center Valley Qazaqstannyń jańa eksporttyq áleýetin qalyptastyrady. Esepteý qýattaryn el ishinde ornalastyra otyryp, biz otandyq AI-sheshimderdi damytýǵa, jahandyq kompanıalardy tartýǵa jáne Qazaqstannyń halyqaralyq sıfrlyq qyzmetter naryǵyna shyǵýyna jaǵdaı jasaımyz», — dep atap ótti Premer-mınıstrdiń orynbasary — jasandy ıntellekt jáne sıfrlyq damý mınıstri Jaslan Madıev.
Joba aıasynda qosymsha IT-qýattardy qurý úshin birqatar sheteldik kompanıalarmen yntymaqtastyq pysyqtalýda. Kelissózder jańa ınvestorlar men ıakor klıentterdi tartýdy, joǵary ónimdi esepteý klasterlerin ornalastyrýdy jáne bulttyq qyzmetterdi damytýdy qamtıdy.
Sonymen qatar, elde Cloud First Policy (Data Embassy) jobasyna daıyndyq júrip jatyr. Bul joba Qazaqstanda shetel memleketteriniń derekterin olardyń tolyq zańdy egemendigin saqtaı otyryp ornalastyrý múmkindigin qarastyrady.