Qaraǵandy oblysynda polıseıler alǵash ret jasandy ıntellektimen jabdyqtalǵan robot-ıtti qyzmetke qosty. Ol tobyr ishinen tórt quqyq buzýshyny tabýǵa kómektesti. infohub.kz Polisia.kz-ke silteme jasap habarlaǵandaı, eki kúndik jumys barysynda jańa tehnologıa buqaralyq is-sharalar kezinde tórt adamdy anyqtady. Robotty Balqash pen Temirtaýdaǵy Metalýrg kúnin merekeleýde synaqtan ótkizdi.
17–18 shildede ótken sharalarǵa 115 myńnan astam adam qatysty. Qaýipsizdikti qamtamasyz etý úshin polısıa jeke quramdy kúsheıtilgen rejımge kóshirip, 1 myńnan asa qyzmetkerdi tartty.
Polısıanyń aqparattyq bazasymen ıntegrasıalanǵan robot-ıt naqty ýaqyt rejıminde adamdardyń betin tanı alady. Bul izdeýli júrgen azamattardy tezirek anyqtaýǵa jáne quqyq buzýshylyqtardyń aldyn alýǵa múmkindik beredi.
Qyzmet barysynda robot tórt adamdy tapty: alıment tólemegen boryshker, memleket aldynda qaryzy bar eki azamat jáne sot úıden tys júrýge tyıym salǵan buryn sottalǵan er adam. Barlyq quqyq buzýshylarǵa zańda kózdelgen sharalar qoldanyldy.
Sonymen qatar polıseıler 3 pen 17 jas aralyǵyndaǵy joǵalǵan 87 balany taýyp, ata-analaryna qaıtardy.
Polısıa robotty tehnologıalardy qoldaný ishki ister organdaryn sıfrlyq transformasıalaýdyń kezekti kezeńi ekenin atap ótti. Vedomstvonyń pikirinshe, mundaı sheshimder qoǵamdyq tártipti qorǵaý tıimdiligin arttyryp, azamattardyń qaýipsizdigin jańa deńgeıde qamtamasyz etýge múmkindik beredi.
Buǵan deıin polısıa robottary Astananyń saýda ortalyqtary men vokzaldarynda, al robot-ıtter Aqtaý kóshelerinde patrúldik qyzmet atqaratyny habarlanǵan bolatyn.