Qazaqstan Syrtqy ister mınıstri Ermek Qosherbaev Rýmynıa SİM basshysynyń mindetin atqarýshy Oana Soıýmen telefon arqyly sóılesti. Taraptar Kaspı qubyr konsorsıýmynyń (KTK) jumysyna qaýip tóndiretin kez kelgen áreketti aıyptady, dep habarlaıdy infohub.kz.
Áńgime barysynda ekijaqty qatynastar úshin strategıalyq mańyzy bar energetıkalyq yntymaqtastyqqa erekshe nazar aýdaryldy. Suhbattastar qazaqstandyq munaıdyń álemdik naryqqa eksportyn qamtamasyz etýde sheshýshi ról atqaratyn KTK aınalasyndaǵy jaǵdaıdy talqylady.
Taraptar energetıkalyq ınfraqurylymnyń turaqty jumysynyń strategıalyq mańyzdylyǵyn jáne eýropalyq naryqqa kómirsýtekterdiń senimdi jetkizilýin atap ótip, KTK ınfraqurylymynyń jumysyna jáne energıa jetkizý qaýipsizdigine qaýip tóndiretin kez kelgen áreketti aıyptady.
Syrtqy saıası vedomstvolardyń basshylary Qazaqstan men Rýmynıanyń energetıka salasyndaǵy praktıkalyq ózara is-qımylyn odan ári damytýǵa ózara qyzyǵýshylyqtaryn atap ótti. Oana Soıý Ermek Qosherbaevty Rýmynıaǵa resmı saparmen kelýge shaqyrdy.