Qazaqstanda sý resýrstary jáne ırrıgasıa mınıstrligi janynan sý dıplomatıasy departamenti quryldy. Vedomstvony 34 jastaǵy Danıar Shárip basqarady, dep habarlaıdy infohub.kz.
Mınıstrliktiń baspasóz qyzmetiniń málimetinshe, jańa bólimshe eldiń sý dıplomatıasy salasyndaǵy júıeli ári dáıekti jumysyn qamtamasyz etýge arnalǵan. Departament Qazaqstannyń transshekaralyq sý obektileri boıynsha turaqty jumys isteıtin memleketaralyq komısıalarǵa qatysýyn úılestiredi, áriptes memlekettermen kelissóz prosesin súıemeldeıdi, sondaı-aq sý salasyndaǵy memleketaralyq kelisimderdi daıyndaý men iske asyrýmen aınalysady.
Danıar Shárip 1992 jyly Almaty oblysynda dúnıege kelgen. Ol ál-Farabı atyndaǵy Qazaq ulttyq ýnıversıtetin «Gıdrologıa» mamandyǵy boıynsha jáne Kaspı qoǵamdyq ýnıversıtetin «Quqyqtaný» mamandyǵy boıynsha bitirgen.
Eńbek jolyn 2015 jyly Qazaqstan Respýblıkasy Aýyl sharýashylyǵy mınıstrligi Sý resýrstary komıtetiniń Sý sharýashylyǵy qurylystaryn paıdalaný jáne damytý basqarmasynda ekspert mindetin atqarýshy bolyp bastaǵan. Keıin ekspert jáne bas ekspert bolyp jumys istegen.
2019 jyly Aýyl sharýashylyǵy mınıstrligi Transshekaralyq ózender departamentiniń Transshekaralyq ózender basqarmasynyń bas eksperti qyzmetin atqarǵan. 2019-2023 jyldary Qazaqstan Respýblıkasy Ekologıa, geologıa jáne tabıǵı resýrstar mınıstrligi Transshekaralyq ózender departamentiniń Transshekaralyq ózender basqarmasynyń bas eksperti, keıin basqarma basshysy bolǵan.
2023-2024 jyldary Qazaqstan Respýblıkasy Úkimet apparatynyń bas ınspektory qyzmetin atqarǵan. 2024 jyldan bastap qazirge deıin Qazaqstan Respýblıkasy Sý resýrstary jáne ırrıgasıa mınıstrligi Halyqaralyq yntymaqtastyq departamenti dırektorynyń orynbasary, keıin dırektory bolyp jumys isteýde.