Qazaqstanda jergilikti atqarýshy organdar bóletin memlekettik granttarǵa konkýrsqa ótinim qabyldaý bastaldy, dep habarlaıdy infohub.kz saıty.
Ǵylym jáne joǵary bilim mınıstrliginde atap ótkendeı, ákimdikter jyl saıyn óńirler úshin suranysqa ıe jáne basym baǵyttar boıynsha kadrlar daıarlaýǵa granttar bóledi.
Bıyl jergilikti atqarýshy organdar bakalavrıat, magıstratýra jáne rezıdentýra baǵdarlamalary boıynsha oqýǵa 2 392 bilim grantyn bóldi. Granttardyń óńirler boıynsha bólinýi mynadaı: Astanada — 303 grant, Shymkentte — 285 grant, Shyǵys Qazaqstan oblysynda — 270 grant, Batys Qazaqstan oblysynda — 211 grant, Abaı jáne Túrkistan oblystarynda — 200 granttan, Aqmola oblysynda — 199 grant, Qaraǵandy oblysynda — 198 grant, Atyraý oblysynda — 187 grant, Mańǵystaý oblysynda — 163 grant. Qalǵan óńirler shamamen 100 granttan bóldi.
Vedomstvo túsindirgendeı: «Konkýrsqa qatysý úshin talapkerler tańdaǵan joǵary oqý ornynyń qabyldaý komısıasyna ótinim berýi qajet. Ótinimge bilim týraly qujat, negizgi UBT sertıfıkaty, jeke basty kýálandyratyn qujattyń kóshirmesi, sondaı-aq jeńildikterge quqyǵyn rastaıtyn qujattar (bar bolsa) qosa beriledi».
Qujattardy qabyldaý merzimi týraly aqparatty jergilikti atqarýshy organdar men joǵary oqý oryndarynyń qabyldaý komısıalarynan alýǵa bolatyny aıtylǵan. Bilim granttaryn berý týraly sheshimdi tıisti ákimdik janynan qurylǵan arnaıy komısıa qabyldaıdy.
Joǵary oqý oryndaryna túsý úshin qujattardy qabyldaý 25 tamyzǵa deıin jalǵasady.
Eske salaıyq, keshe Qazaqstanda bilim granttaryn alǵandardyń resmı tizimi jarıalanǵan bolatyn. Onymen silteme arqyly tanysýǵa bolady. Sodan keıin QR Ǵylym jáne joǵary bilim mınıstrligi qazaqstandyq talapkerlerdiń grant konkýrsyndaǵy jeńisine reaksıalarynyń iriktemesi bar beınerolık jarıalady. Al vedomstvo basshysy grantqa iline almaǵandardyń ata-analaryna úndep, áke-sheshelerdi balalaryn qoldaýǵa shaqyrdy.