Qazaqstandaǵy turmystyq qyzmet naryǵyna jasalǵan taldaý 15 sanattyń 8-inde qyzmet kóleminiń kúrt tómendegenin kórsetti. Resmı statısıka shashtarazdar, sulýlyq salondary, grýmıng jáne basqa qyzmetterge suranystyń azaıǵanyn tirkeıdi, alaıda sarapshylar muny bıznestiń kóleńkege ketýimen baılanystyrady, dep habarlaıdy infohub.kz saıty.
2025 jyldyń qorytyndysy boıynsha erler jáne balalar shashtarazdarynyń qyzmet kólemi nebári 6,3 mlrd teńgeni qurady, bul 2024 jylǵy kórsetkishten 5,5 ese az. Mundaı eleýli quldyraýdy tek tutynýshylyq ádetterdiń ózgerýimen túsindirý qıyn.
Basqa segmentterde de osyndaı jaǵdaı: neke agenttikteriniń qyzmet kólemi 195 ese, aqyly dárethanalardiki — eki ese, sulýlyq salondaryniki — 42,9%-ǵa, grýmıng-salondardiki — 49 ese (4,1 mlrd teńgeden 83 mln teńgege deıin) qysqarǵan.
Kosmetologıalyq qyzmetter, manıkúr jáne pedıkúrdiń kópjyldyq dınamıkasy da kúmán týdyrady: 2025 jyly bul qyzmetterdiń kólemi 2022 jylǵy deńgeıden úsh ese tómen, alaıda qazaqstandyqtar olardy tutynýdan kúrt bas tartty dep aıtý ekitalaı.
Sarapshylardyń pikirinshe, kásipkerlerdiń bir bóligi kóleńkeli sektorǵa ketken. Buǵan 2025 jyly jeke kásipkerlerge salyq júktemesiniń artýy dálel: áleýmettik aýdarymdar mólsherlemesi 3,5%-dan 5%-ǵa, mindetti zeınetaqy jarnalary 1,5%-dan 2,5%-ǵa ósti, bul mindetti tólemderdiń eń tómengi mólsheriniń ósýine ákeldi.