Qazaqstan Kólik mınıstrligi jolaýshylardy, bagajdy jáne júkterdi áýe kóligimen tasymaldaý erejelerine ózgerister engizý jobasyn qoǵamdyq talqylaýǵa usyndy. Jańa erejeler qyzmet kórsetýdi jetildirýge jáne jolaýshylar quqyǵyn qorǵaýdy kúsheıtýge baǵyttalǵan, dep habarlaıdy infohub.kz.
Usynystardyń biri mýzykalyq aspaptardy tasymaldaýǵa qatysty. Olardy ushaq salonynda qol júgi retinde, jeke jolaýshy ornynda nemese tirkelgen bagaj retinde belgilengen talaptardy saqtaı otyryp tasymaldaýǵa ruqsat berý josparlanýda. Atap aıtqanda, dombyra men qobyz sıaqty aspaptardy salonda berik qorǵanysh qabynda tasymaldaý múmkindigin bekitý usynylady. Bul rette aspaptardyń ólshemderi 110×35×30 sm-den, salmaǵy 10 kg-nan aspaýy tıis.
Taǵy bir ózgeris janýarlardy tasymaldaýǵa qatysty: qujat boıynsha, olardy áýekompanıalar belgilegen sharttarmen ushaq salonynda tasymaldaýǵa bolady. Sonymen qatar, múgedektigi bar jolaýshylarǵa áýe tasymaly boıynsha jeńildikterdi zań júzinde bekitý usynylady.
Eger ushaqtyń ornyna syıymdylyǵy az áýe kemesi qoıylsa, otyrǵyzý kezinde kámeletke tolmaǵandarǵa, múgedektigi bar adamdarǵa, aýyr naýqastarǵa, júkti áıelder men zeınetkerlerge basymdyq berý josparlanýda.
Jolaýshylar quqyǵyn qorǵaýdy kúsheıtý maqsatynda joba jolaýshyny jetkizý keshiktirilgeni úshin aıyppuldy tóleýdiń naqty merzimin — tıisti ótinish berilgen kúnnen bastap 10 kúntizbelik kúnnen asyrmaýdy belgileýdi usynady. Sondaı-aq, tasymaldaýshynyń kinási dáleldengen jaǵdaıda, tirkelmegen bagajdyń zaqymdalýy úshin áýekompanıalardyń jaýapkershiligin qarastyrý josparlanýda.
Normatıvtik quqyqtyq aktiniń jobasy «Ashyq NQA» portalynda jarıalanǵan, onda barlyq nıet bildirýshiler qujatpen tanysyp, óz usynystary men eskertýlerin qaldyra alady.