Eki eldiń quqyq qorǵaý organdary birlesip júrgizgen arnaıy operasıa kámeletke tolmaǵan jasóspirimdi ustaýmen aıaqtaldy: ol Astanadaǵy saýda-oıyn-saýyq ortalyqtarynyń birinde terakt jasaý týraly kórineý jalǵan habarlama taratqan dep kúdikke ilindi, dep habarlaıdy infohub.kz saıty.
Qazaqstan İshki ister mınıstrliginiń málimetinshe, 26 tamyzda Ýkraınanyń Sýmy qalasynda kámeletke tolmaǵan jasóspirim ustaldy. İs-sharalar Qazaqstan İİM men Ýkraına kıberpolısıasynyń ózara is-qımyly barysynda ótti.
Tintý kezinde uıaly telefondar, planshetter, noýtbýk, júıelik blok jáne bank kartasy tárkilendi. Elektrondyq qurylǵylardan sıfrlyq dálelder, sonyń ishinde paıdalanylǵan akkaýnt, jiberilgen habarlamanyń mátini jáne basqa da málimetter tabyldy.
Qazirgi tańda tárkilengen tehnıkany taldaý júrgizilip jatyr, ol yqtımal sybaılastardy anyqtaý jáne ustalǵan adamnyń osyǵan uqsas faktilerge qatysyn tekserý úshin qajet, delingen vedomstvo habarlamasynda.
Ýkraınanyń quzyretti organdarymen odan ári prosestik sheshimder qabyldaý máselesi boıynsha ózara is-qımyl jalǵasyp jatqany atap ótildi.
Qazaqstan İİM eske salady: mınalaý, terorızm, adam kepilge alý jáne ózge de qaýipsizdikke tónetin qaterler týraly jalǵan habarlamalar — oıyn emes. Mundaı áreketter aýyr quqyqtyq saldarǵa ákep soǵady. Ata-analarǵa balalarǵa ınternette qaýipsiz jáne jaýapty minez-qulyq erejelerin túsindirý, sondaı-aq áleýmettik jeliler men messendjerlerdegi kúdikti belsendilikke nazar aýdarý usynylady, dep eskertti polısıada.
Buǵan deıin Qostanaıda jasóspirim daıyndalyp jatqan terakt týraly jalǵan habarlama úshin jaýapkershilikke tartylyp, oǵan shartty túrde bas bostandyǵynan aıyrý jazasy taǵaıyndalǵany habarlanǵan bolatyn.