Qazaqstandyqtardyń shamamen 86%-y ómirine qanaǵattanady, al jartysynan kóbi odan ári oń ózgeristerdi kútedi. Bul derekterdi Astanada ótken National Think Tank Forum-da Qazaqstandyq qoǵamdyq damý ınstıtýtynyń basqarma tóraıymy Juldyzaı Ysqaqova jarıa etti, dep habarlaıdy infohub.kz saıty.
Onyń aıtýynsha, zertteýler qazaqstandyqtardyń 85,8%-y ómirine qanaǵattanatynyn, al 60%-y odan ári oń ózgeristerdi kútetinin kórsetedi.
«Kelesi kezeń – jeke kórsetkishterdi ólsheýden demografıalyq, áleýmettik, ekonomıkalyq, tehnologıalyq jáne ınstıtýsıonaldyq ózgeristerdiń adamnyń ál-aýqaty men jańa múmkindikterine qalaı aınalatynyn keshendi baǵalaýǵa kóshý», – dedi Ysqaqova.
Forýmda memlekettik organdar men analıtıkalyq ortalyqtardyń ókilderi Qazaqstannyń damý nátıjeleri men aldaǵy jyldary el nazar aýdarýǵa tıis baǵyttardy talqylady.
Qazaqstan Ortalyq Azıada kóshbasshylyǵyn saqtap qaldy. Ekonomıkalyq zertteýler ınstıtýtynyń basqarma tóraǵasynyń orynbasary Dastan Aqybaevtyń aıtýynsha, 2025 jyldyń qorytyndysy boıynsha Qazaqstannyń JİÓ 159,6 trln teńgege, ıaǵnı shamamen $306 mlrd-qa jetti.
Ol keltirgen derekter boıynsha, Qazaqstanǵa Ortalyq Azıanyń jıyntyq JİÓ-niń shamamen 54%-y tıesili, al sońǵy bes jylda ekonomıkanyń naqty ósimi 21,3%-dy qurady.
Taǵy bir aıtarlyqtaı kórsetkish – shıkizattyq emes eksport. QazIndustry basqarma tóraǵasy Eldar Ǵumarovtyń aıtýynsha, 2025 jyly onyń kólemi $29 mlrd-qa jetip, 2021 jylmen salystyrǵanda 45%-ǵa ósti.
Qazaqstan kórsetkishterdiń ósýinen sapaǵa kóshkisi keledi. Forýmǵa qatysýshylar bilim berý, sıfrlandyrý jáne jasandy ıntellekt máselelerin jeke talqylady.
Ǵylym jáne joǵary bilim mınıstri Saıasat Nurbektiń aıtýynsha, qazir Qazaqstanda sheteldik ýnıversıtetterdiń 33 fılıaly jumys isteıdi, al otandyq joǵary oqý oryndarynda 92 elden 37 myńnan astam sheteldik stýdent bilim alady.
«Sapaly bilimdi, halyqaralyq talanttar mobıldiligin, jasandy ıntellekt pen qoldanbaly ǵylymdy ushtastyrý Qazaqstannyń bilim ekonomıkasyna kóshýiniń negizin qalyptastyrady», – dedi Nurbek.
Q.AI bas dırektory Dmıtrı Mýn Qazaqstannyń BUU elektrondyq úkimetti damytý ındeksinde 193 eldiń ishinde 24-orynda turǵanyn jáne onlaın-qyzmetter ındeksi boıynsha alǵashqy ondyqqa kiretinin atap ótti. Sıfrlandyrýdyń kelesi kezeńi Ulttyq jasandy ıntellekt platformasy, AI-agentter jáne derekterge negizdelgen basqarý bolýy tıis.
Forýmǵa qatysýshylar eldiń odan ári damýy endi tek salynǵan nysandardyń sanymen, ekonomıka kólemimen nemese memlekettik qyzmetterdiń qoljetimdiligimen ólshenbeýi kerek degen ortaq pikirge keldi. Olar negizgi mindet retinde sapaly ózgeristerge – bilim deńgeıin arttyrýǵa, ekonomıkanyń tehnologıalyq deńgeıin kóterýge jáne memlekettik ınstıtýttardyń jańa jaǵdaılarǵa beıimdelý qabiletin arttyrýǵa kóshýdi atady.