Vetnamdaǵy Qazaqstan mádenıet kúnderi aıasynda QR vıse-premeri — mádenıet jáne aqparat mınıstri Aıda Balaeva Vetnam Sosıalısik Respýblıkasy premer-mınıstriniń orynbasary Fam Thı Than Chamen kezdesti. Taraptar ekijaqty qarym-qatynastardy odan ári damytýdyń perspektıvalyq baǵyttaryn talqylady, dep habarlaıdy infohub.kz.
Balaevanyń aıtýynsha, ótken jyly eki memleket strategıalyq áriptestik deńgeıine shyqqannan keıin olardyń qarym-qatynasy jańa kezeńge aıaq basty. Bul saıası jáne ekonomıkalyq baılanystardy ǵana emes, mádenı-gýmanıtarlyq yntymaqtastyqty tereńdetýge de jaǵdaı jasaıdy.
«Biz Vetnamdaǵy mádenı jáne kreatıvti ındýstrıalardyń damýyn úlken qyzyǵýshylyqpen baqylap otyrmyz. Munda kıno, oryndaýshylyq óner, mádenı týrızmnen bastap murany saqtaý, dástúrli qolóner jáne zamanaýı dızaınǵa deıingi yntymaqtastyqtyń birqatar perspektıvalyq baǵyttaryn kórip otyrmyz. Osy salalarda tájirıbe almasý bizdiń yntymaqtastyǵymyzǵa jańa serpin bere alatynyna senimdimin», — dep atap ótti ol.
Kelissózderde kreatıvti týrızmdi damytýǵa erekshe nazar aýdaryldy. Bul format saıahatshylardyń dástúrli qolóner, gastronomıa, sheberlik sabaqtary jáne shyǵarmashylyq baǵdarlamalarǵa qatysý arqyly jergilikti mádenı ortaǵa tereń enýin kózdeıdi.
Sonymen qatar, Aıda Balaeva kınematografıa salasyndaǵy yntymaqtastyqty jandandyrýdy usyndy. Atap aıtqanda, Qazaqstan men Vetnamda ózara kınoaptalyqtar ótkizý, eki el kınematografısteriniń halyqaralyq festıválderge qatysýyn keńeıtý jáne eki eldiń aýmaǵynda túsirilimder uıymdastyrý.
Taǵy bir basym baǵyt — keshendi týrısik baǵyttardy qurý jumysy. Olar Qazaqstan men Vetnamnyń mádenı mura obektilerin, tarıhı qalalaryn, murajaılaryn, qolóner ortalyqtaryn jáne zamanaýı art-keńistikterin biriktiredi.
Kezdesý qorytyndysy boıynsha taraptar birlesken bastamalardy júzege asyrýǵa ózara qyzyǵýshylyqtaryn rastady.