Qazaqstan Prezıdenti Qasym-Jomart Toqaevtyń bastamasymen Halyqaralyq eriktiler jyly aıasynda Nú-Iorktegi BUU shtab-páterinde volonterlik salasyndaǵy halyqaralyq yntymaqtastyqty damytýǵa arnalǵan birqatar is-shara ótti, dep habarlaıdy infohub.kz saıty.
Bastamany Qazaqstan kóterdi. Ony Ázerbaıjannyń Ózara İs-Qımyl jáne Senim Sharalary Keńesindegi (ÓSK) tóraǵalyǵy, ÓSK hatshylyǵy jáne BUU Eriktiler baǵdarlamasy qoldady.
Baǵdarlama aıasynda «ÓSK-ge múshe memleketterdegi volonterlik» atty fotovystavka ashyldy jáne «ÓSK-ge múshe memleketterdegi volonterliktiń úzdik tájirıbeleri» taqyrybynda halyqaralyq paneldik pikirtalas ótti. Qatysýshylarǵa ÓSK elderindegi eriktilikti damytýdyń ozyq tájirıbesi týraly elektrondy basylym da tanystyryldy.
Pikirtalasta Qazaqstannyń tájirıbesine erekshe nazar aýdaryldy. BUU ókilderi eriktilik qyzmetin esepke alýdyń ulttyq júıesin jáne el ishinde de, halyqaralyq deńgeıde de volonterlikti ilgeriletý jónindegi turaqty memlekettik saıasatty joǵary baǵalady.
Talqylaýǵa BUU, ÓSK-ge múshe memleketterdiń ókilderi men halyqaralyq sarapshylar qatysty. Olar volonterlik, jastardyń qatysýy jáne halyqaralyq yntymaqtastyq salasyndaǵy tabysty tájirıbelermen bólisti.
İs-sharalardyń BUU shtab-páterinde ótýi Qazaqstannyń jahandyq eriktilik kún tártibin ilgeriletýge jáne turaqty damý múddesindegi yntymaqtastyqty nyǵaıtýǵa qosqan úlesiniń moıyndalǵanyn rastady.