AQSH-tyń Iýdjın qalasynda (Oregon shtaty) jastar arasyndaǵy jeńil atletıkadan álem chempıonaty aıaqtaldy. Bul dodaǵa qazaqstandyq sportshylar qatysty. Dısk laqtyrýshy Maksım Sajnev fınalda 11-orynǵa taban tiredi. Ol alǵashqy áreketinde 59,85 metr nátıje kórsetti, dep habarlaıdy infohub.kz.
17 jastaǵy Sajnev kelesi eki áreketin sátsiz aıaqtap, irikteýdegi nátıjesin (61,37 metr) jaqsarta almady. Bul kórsetkish Qazaqstannyń jastar arasyndaǵy rekordy bolyp tabylady. Alaıda, osy nátıjemen de ol tek 10-orynǵa kóteriler edi. Fınalda 13 qatysýshynyń beseýi jeke rekordtaryn jańartty. Al amerıkalyq Sımon Rossellı týrnır rekordyn (66,39 metr) kórsetip, altyn medalǵa ıe boldy. Kúmis júldeni estondyq Sten-Erık Iır (65,42), qolany ıamaıkalyq Djozef Rıchard Salmon (64,37) jeńip aldy.
Osylaısha, irikteýden ótip, fınalǵa shyqqan eki qazaqstandyq ta 11-orynǵa turaqtady. Buǵan deıin syryqpen sekirýshi Anna Cherkashına da 11-oryn alyp, eldiń jastar arasyndaǵy rekordyn jańartqan bolatyn (4,10 metr).
Jalpy, Iýdjındegi álem chempıonatynda Qazaqstan atynan irikteý normatıvterin oryndaǵan 11 jeńil atlet óner kórsetti. Bul — 2008 jyldan beri eń kóp quram. Sol jyly Polshanyń Bydgosh qalasynda ótken týrnırde 12 sportshy baq synaǵan edi. Salystyrý úshin, eki jyl buryn Perý astanasy Lımada bes qazaqstandyq bolsa, 2022 jyly Kolýmbıanyń Kalı qalasynda tórteýi ǵana qatysqan.
Qazaqstan jastar arasyndaǵy álem chempıonattaryna 1994 jyldan beri jeke komandamen qatysyp keledi. Osy ýaqyt ishinde bizdiń sportshylar qatarynan 16 týrnırge qatysty, alaıda áli birde-bir ret júldeli orynǵa kóterilgen joq.