Grýzıada qazaqstandyq júrgizýshige qatysty sot prosesi ótip jatyr. Ol psıhotroptyq zattardy saqtaý jáne tasymaldaý dep aıyptalýda. Týystarynyń aıtýynsha, dári-dármekterdi dáriger taǵaıyndaǵan, dep habarlaıdy infohub.kz.
Shýchınsk qalasynyń turǵyny Iýlıa Chekýlaeva kúıeýi Ivan Chekýlaevtyń sáýir aıynda júk kóligimen Grýzıaǵa kezekti reıske shyqqanyn aıtty. Onyń sózinshe, er adamnyń qasynda Germanıadaǵy dáriger taǵaıyndaǵan aýyrsynýdy basatyn dáriler bolǵan. Alaıda Potı portyndaǵy kedende er adamnan Grýzıada psıhotroptyq zat retinde jikteletin dári tabylyp, ol ustaldy.
«Biz ony reısten kúttik, úıge oralǵanyn qalaımyz. Ol óte sabyrly, jaýapty jigit, ol eshteńe isteı almaıdy. Tek qasynda qaǵazy bolmaǵan. Qaǵazsyz biz sol kezde eshkim emespiz», — dedi Iýlıa Chekýlaeva.
Áıeldiń aıtýynsha, kúıeýine arqasyndaǵy aýyrsynýǵa qarsy dárini Germanıadaǵy dáriger jazǵan, biraq resepti qolynda bolmaǵan. Osyǵan baılanysty Grýzıa zańdary boıynsha ol ustalyp, sotqa berildi. 44 jastaǵy qazaqstandyqqa 15 jylǵa deıin bas bostandyǵynan aıyrý jazasy qaýip tónip tur.
Qazaqstan Syrtqy ister mınıstrligi jaǵdaıǵa túsinikteme berdi: «Qoldaǵy aqparatqa sáıkes, atalǵan azamatqa qatysty Grýzıa Qylmystyq kodeksiniń 262-babynyń 1-bóligi boıynsha qylmystyq is qozǵaldy. Bul bap esirtki nemese psıhotroptyq zattardy satý maqsatynsyz zańsyz saqtaý nemese tasymaldaý úshin jaýapkershilikti kózdeıdi. Qazaqstannyń Grýzıadaǵy dıplomattary óz quzyreti sheńberinde otandasymyzǵa qajetti konsýldyq-quqyqtyq kómek kórsetýde. Bul másele mınıstrliktiń baqylaýynda».