Tájikstan astanasynda «Qazaqstan medısınasy kúnderi» aıasynda akademık Batpenov atyndaǵy Ulttyq travmatologıa jáne ortopedıa ǵylymı ortalyǵynyń jetekshi travmatolog-ortopedteri «Istıklol» kesheninde kúrdeli hırýrgıalyq otalar jasady, dep habarlaıdy infohub.kz saıty.
Kúnniń eń kúrdeli otalarynyń biri – 13 jasar jasóspirimge IV dárejeli skolıozdy túzetý boldy. Ony tájik áriptesterimen birlesip, UTOǴO omyrtqa patologıasy ortalyǵynyń dırektory Seıdaly Ábdalıev pen omyrtqa jaraqaty bólimshesiniń meńgerýshisi Murat Baıdarbekov jasady.
Taǵy bir kúrdeli ota jol-kólik oqıǵasynan zardap shekken 37 jastaǵy er adamǵa jasaldy. Oǵan aýyr aralas jaraqat dıagnozy qoıyldy: jambas súıekteriniń zaqymdanýy, sol jaq san súıegi basynyń ortalyq shyǵýy, oń jilinshiktiń synýy jáne oń aıaq tabanynyń taran súıeginiń shyǵýy.
«Ómirlik kórsetkishter boıynsha taran súıeginiń shyǵýyn qalpyna keltirý jáne oń jilinshiktiń osteosıntezi jasaldy. Otany Qaırat Tajın áriptesterimen birge jasady», – delingen habarlamada.
Otalardan bólek, qazaqstandyq hırýrgtar jergilikti pasıentterdi omyrtqa aýrýlary men jaraqat saldarynan, sondaı-aq ortopedıalyq patologıasy bar adamdardy qabyldady. Bir kúnde dárigerler stasıonarda 23 pasıentti qarap, 67 adamǵa keńes berdi.
Buǵan deıin Tájikstanǵa kardıologıa, onkologıa, akýsherlik-gınekologıa, pedıatrıa jáne travmatologıa salalaryndaǵy respýblıkalyq ortalyqtardyń qazaqstandyq dárigerleri kelgeni habarlanǵan bolatyn. Dýshanbedegi Qazaqstan medısınasy kúnderi aıasynda otandyq mamandar birlesken otalar men sheberlik sabaqtaryn ótkizedi.