Qazaqstan turǵyndary úshin shildede et, qus eti jáne komýnaldyq qyzmetter baǵasynyń eń aıtarlyqtaı ósýi baıqaldy, dep habarlaıdy infohub.kz saıty.
Ulttyq banktiń saýalnamasyna sáıkes, respondentterdiń 59,9%-y et pen qus etiniń qymbattaǵanyn, 56%-y turǵyn úı-kommýnaldyq qyzmetterdiń, 51,6%-y dári-dármektiń, al 49,2%-y irimshik pen shujyq ónimderiniń qymbattaǵanyn atap ótti.
Maýsymmen salystyrǵanda kórsetkishter aıtarlyqtaı ózgergen joq: onda et pen qus etiniń qymbattaǵanyn saýalnamaǵa qatysqandardyń 61,1%-y, komýnaldyq qyzmetterdiń qymbattaǵanyn 56,3%-y baıqaǵan.
Sonymen qatar, jemis-kókónistiń qymbattaýyna alańdaıtyn qazaqstandyqtardyń úlesi maýsymdaǵy 54,4%-dan shildede 47,3%-ǵa deıin tómendedi.
Ulttyq banktiń saýalnamasyna aı saıyn eldiń ártúrli óńirlerinen 1,5 myń kámeletke tolǵan turǵyn qatysady.
Buǵan deıin «Kýrsıv» et pen qus etiniń azyq-túlik ınflásıasyna eń úlken úles qosyp jatqanyn habarlaǵan. Ulttyq statısıka búrosynyń derekterine sáıkes, 2026 jylǵy maýsymda bul sanattaǵy baǵalar jyldyq mánde 17,6%-ǵa ósip, jalpy ınflásıanyń 10,3% deńgeıinen 1,555 paıyzdyq tarmaqty qamtamasyz etti.
Áleýmettik mańyzy bar azyq-túlik ónimderiniń ishinde bir jyl ishinde eń qatty qoı eti qymbattady — 28,6%-ǵa. Súıekti sıyr etiniń baǵasy 17,8%-ǵa, súıeksiz sıyr eti 17,5%-ǵa, tartylǵan et 16,4%-ǵa, taýyqtyń jambasy, sıraǵy jáne tósi 15,6%-ǵa ósti.
Jumyrtqa 15,4%-ǵa, jylqy eti 15,1%-ǵa, al tutas taýyq 12,1%-ǵa qymbattady.
2026 jyldyń basynan beri et ónimderiniń baǵasynyń ósýi azyraq baıqaldy: qoı eti 14,9%-ǵa, súıekti sıyr eti 4,6%-ǵa, súıeksiz sıyr eti 1,5%-ǵa, tartylǵan et 1,6%-ǵa, jylqy eti 3%-ǵa qymbattady.
Sondaı-aq, maýsymda Qazaqstanda benzınniń jyldyq mánde 15,6%-ǵa, suıytylǵan munaı gazynyń 16%-ǵa qymbattaǵany habarlanǵan.