Qazaq ulttyq sport ýnıversıtetiniń (QUSÝ) quramasy Almatyda ótip jatqan JOO arasyndaǵy shahmattan komandalyq álem chempıonatynyń jartylaı fınalyna joldama aldy. Shırek fınalda qazaqstandyqtar Afına ulttyq tehnıkalyq ýnıversıtetiniń komandasyn jeńdi, dep habarlaıdy infohub.kz.
Shırek fınaldyń birinshi týry 2:2 esebimen teń aıaqtaldy, bul bizdiń shahmatshylardy barynsha jınaqtalýǵa májbúr etti. Ekinshi týrda aq túspen halyqaralyq sheber Merýert Kamalıdenova senimdi jeńiske jetti. Satbek Ahmedınov birinshi partıadaǵy jeńilisi úshin revansh aldy. Arystan Isanjýlov pen Qazybek Nógerbek óz partıalaryn teń aıaqtady.
Machtyń jalpy esebi QUSÝ paıdasyna 5:3 bolyp, komanda jartylaı fınalǵa shyqty. Erteń olar týrnırdiń favorıtteri — Ekaterınbýrgten kelgen Oral taý-ken ýnıversıtetiniń komandasymen kezdesedi. Bul komanda shırek fınalda chılılikterge nebári jarty upaı jiberip alǵan.
Ekinshi jartylaı fınal taza amerıkandyq bolady: fınalǵa shyǵý úshin Sent-Lýıs ýnıversıteti men Garvard ýnıversıteti synǵa túsedi. Qazaqstandyqtar osy komandalardyń birimen jeksenbide oınaıdy — ne altyn úshin, ne qola úshin.
Jartylaı fınaldar, úshinshi oryn úshin mach jáne fınal, toptyq kezeń oıyndary sıaqty, eki raýndtan ótedi. Teń bolǵan jaǵdaıda jeńimpazdy taı-breık anyqtaıdy. Machtar tórt taqtada ótedi, ár komandada mindetti túrde keminde bir er jáne keminde bir áıel bolýy tıis. Ýaqyt baqylaýy — 45 mınýt plús ár júriske 30 sekýnd, birinshi júristen bastap.
Týrnırdi FIDE Qazaqstan Respýblıkasynyń Týrızm jáne sport mınıstrligimen, Qazaqstan Respýblıkasynyń Ǵylym jáne joǵary bilim mınıstrligimen, Qazaqstan shahmat federasıasymen jáne Almaty qalasynyń ákimdigimen birlesip uıymdastyrýda. Bas seriktester — Freedom kompanıalar toby jáne «Shapaǵat» korporatıvtik qory.
Jarystyń jalpy júlde qory 50 myń eýrony quraıdy. Chempıondar 25 myń eýro, vıse-chempıondar 15 myń eýro alady, al úshinshi oryn alǵan komanda 10 myń eýrony bólisedi.