Batys Qazaqstan oblysyndaǵy «Syrym» veterınarlyq baqylaý beketinde jalpy salmaǵy 107 tonna ónimdi zańsyz ákelýge jasalǵan eki árekettiń joly kesildi. Júk Cheshen Respýblıkasy men Belarýs Respýblıkasynan kelgen, dep habarlaıdy infohub.kz saıty.
Aýyl sharýashylyǵy mınıstrliginiń málimetinshe, alǵashqy buzýshylyq Cheshen Respýblıkasynan Túrkistan oblysy men Shymkent qalasyna baǵyttalǵan 88 tonna bıdaı kebegine qatysty boldy. «Tekserý barysynda veterınarlyq ilespe qujattar men tańbalaýdyń joqtyǵy, sondaı-aq ónimniń qajetti termıalyq óńdeýden ótpegeni anyqtaldy», — dep naqtylady vedomstvo.
Ekinshi jaǵdaı — Belarýs Respýblıkasynyń Mınsk oblysynan Tashkentke bara jatqan 19 tonna súıeksiz sıyr eti men et jartylaı fabrıkattarynyń tranzıti toqtatyldy.
Mınıstrlik eske salǵandaı, qolaısyz epızootıalyq jaǵdaıǵa baılanysty 2026 jylǵy 24 aqpannan bastap Reseı Federasıasynyń jekelegen oblystary arqyly tıisti ónimdi ákelýge jáne tranzıtteýge ýaqytsha shekteýler qoldanylyp keledi.
«Salmaǵy 107 tonna bolatyn barlyq ónim jóneltý pýnktterine qaıtaryldy. Tasymaldaýshylarǵa qatysty QR ÁQBtK-niń 406-baby boıynsha ákimshilik hattamalar toltyrylyp, aıyppul salyndy. Sondaı-aq EAEO-nyń veterınarlyq-sanıtarlyq talaptaryn saqtaý jóninde túsindirý jumystary júrgizildi», — dep qosty vedomstvo.
Aıta keteıik, jyl basynan beri «Syrym» beketinde 230 buzýshylyq anyqtalyp, 230 avtokólik qaıtaryldy, jalpy somasy 8,9 mln teńge aıyppulǵa 100 ákimshilik hattama toltyryldy.