Prezıdent Qasym-Jomart Toqaev Qarjy monıtorıńi agenttiginiń tóraǵasy Janat Elımanovty qabyldap, vedomstvonyń 2026 jylǵy birinshi jartyjyldyqtaǵy jumysy týraly baıandamasyn tyńdady, dep habarlaıdy infohub.kz.
Alty aı ishinde QMA 496 qylmystyq isti tergep aıaqtady. Zardap shekkenderge 22,6 mlrd teńge kólemindegi zıan óteldi. Sondaı-aq tórteýi transulttyq bolǵan jeti qylmystyq toptyń joly kesildi.
Vedomstvo málimetinshe, aınalymy 176 mlrd teńgeden asatyn zańsyz qolma-qol aqsha aıyrbastaýdyń 44 jelisi, sondaı-aq esirtki bıznesi men alaıaqtyqtan túsken kiristerdi jylystatýǵa paıdalanylǵan 12 kóleńkeli krıptoaıyrbastaý pýnkti joıyldy. Sonymen qatar 36 dropperlik uıashyq anyqtaldy. Olardyń shottary arqyly 113 mlrd teńgege operasıalar júrgizilgen.
TMD elderi arasynda alǵash ret baılanys operatorlarynyń jumysyna elikteıtin arnaıy jabdyqty paıdalaný sulbasy ashyldy. Qylmyskerler buqaralyq fıshıngtik habarlamalar jiberip, azamattardyń jeke derekterine qol jetkizýge tyrysqan.
QMA búdjet shyǵystaryna erekshe nazar aýdardy. Vedomstvo 52 ınfraqurylymdyq joba boıynsha 279 mlrd teńge kólemindegi negizsiz shyǵystardyń aldyn aldy. Sondaı-aq qyzmetkerler ǵylymı ázirlemelerdi komersıalandyrý kezinde 10 mlrd teńgeni jymqyrý qaýpin jáne 140 myń adamdy jeke klınıkalarǵa jalǵan tirkeý arqyly MÁMS-ten zańsyz aqsha alý sulbasyn anyqtady.
Jarty jyl ishinde QMA zańsyz qumar oıyn bıznesiniń belgileri bar toǵyz myń saıt pen akkaýntqa kirýdi buǵattady, 2,3 myń alaıaqtyq resýrs pen aýdıtorıasy 35 myń adamnan asatyn 25 toptyq chattyń jumysyn toqtatty. Kezdesý qorytyndysy boıynsha Toqaev Agenttikke jańa tapsyrmalar berdi.