Japonıada ótip jatqan Azıada-2026 oıyndarynda Qazaqstannyń erler quramasy sabládan fehtovanıeden pedestalǵa kóterildi, dep habarlaıdy infohub.kz saıty.
Komandalyq týrnırde el namysyn Artóm Sarkısán, Nazarbaı Sattarhan, Nurmuhammed Jaılybaı jáne Qýanysh Erǵashbaı qorǵady. 1/8 fınalda qazaqstandyq sabláshylar Saýd Arabıasyn 45:32 esebimen utty, kelesi kezeńde Qytaıdan 45:40 esebimen basym tústi.
Jartylaı fınalda qazaqstandyqtardyń qarsylasy Japonıa quramasy boldy, ol 45:34 esebimen basym tústi. Ereje boıynsha úshinshi oryn úshin jekpe-jek qarastyrylmaǵandyqtan, Qazaqstan komandasy Gonkong sıaqty qola medalǵa qol jetkizdi.
Ulttyq qurama úshin bul Azıada-2026-da fehtovanıeden tórtinshi júlde. Buǵan deıin jeke týrnırlerde Sarkısán qola, al shpagashy Kırıll Prohodov kúmis alǵan. Komandalyq saıysta shpagashy áıelder quramasy qola júldege qol jetkizdi.
Ótken Azıadada Hanchjoý-2022-de sabláshylar da pedestalǵa kóterilgen. Onda komandalyq týrnırde qolany Sarkısán, Sattarhan, Janat Nabıev jáne Muhamedalı Rahmanalı jeńip alǵan.
Sondaı-aq senbide rapırashy áıelder saıysy ótti. Sofıa Aqtaeva, Alóna Gnoevaıa jáne Alına Iskanderovadan quralǵan Qazaqstan quramasy Qytaıdan 36:40 esebimen jeńilip, shırek fınalda jarystan shyǵyp qaldy.