Japonıada ótip jatqan 2026 jylǵy jazǵy Azıa oıyndarynyń kezekti jarys kúninen keıin Qazaqstan quramasy jalpy medal esebinde úsh orynǵa tómendedi, dep habarlaıdy infohub.kz saıty.
Ulttyq qurama ekinshi kún qatarynan altyn medalǵa qol jetkize almady. Osynyń saldarynan ol besinshi orynnan segizinshi orynǵa syrǵydy. Qazaqstan quramasyn Taıland, Bahreın jáne Iran basyp ozdy.
Seısenbide bıiktikke sekirýden Krıstına Ovchınnıkova kúmis medal jeńip aldy. Qazaqstan quramasynyń qorjynyna kýrash kúresinen Araılym Shegenova (87 keliden joǵary salmaq dárejesi) jáne «trap» dısıplınasy boıynsha stendtik atý komandasy — Álisher Aısalbaev, Danııl jáne Mark Pochıvalovtar qola medal saldy.
Bokstan Qazaqstan quramasyna keminde bir medaldy Aıbek Oralbaı kepildendirdi. Ol 90 keliden joǵary salmaq dárejesinde fınalǵa shyqty. Qazaqstandyqtar qatysatyn qalǵan jartylaı fınaldyq jekpe-jekter 30 qyrkúıekke josparlanǵan.
Sonymen qatar sársenbide ulttyq qurama velotrekte komandalyq qýalaý jarysynda qola úshin kúresetin bolady. Bul dısıplınada el namysyn Ilá Karabýtov, Maksım Horoshavın, Ramıs Dinmuhametov jáne Dmıtrı Noskov qorǵaıdy.