Vengrıada «Imre Poııak, Ianosh Varga jáne Ishtvan Kozma memorıaly» atty bedeldi kúres týrnıri bastaldy. Kilemge aldymen erkin kúres balýandary shyqty. Qazaqstan quramasy bir altyn, bir kúmis jáne tórt qola – barlyǵy alty júldege ıe boldy, dep habarlaıdy infohub.kz.
61 kelige deıingi salmaq dárejesinde altyndy Asyl Aıtakyn jeńip aldy. Fınalda ol túrik balýany Tolga Ózbekpen kezdesti. Jekpe-jek 2:2 esebimen teń aıaqtaldy, biraq qosymsha kórsetkishter boıynsha jeńis qazaqstandyqqa berildi. Kúmis júlde Nurqoja Qaıpanovqa buıyrdy (74 kelige deıin). Fınalda ol qytaılyq Fen Lýmen kúresti, jekpe-jek taǵy da teń aıaqtaldy – 3:3. Alaıda sońǵy nátıjeli áreket erejesi boıynsha altyn qarsylasyna ketti.
Qola júldegerler: Nurdanat Aıtanov pen Meırambek Qartbaı (57 kelige deıin), Ádilet Almuhamedov (61 kelige deıin) jáne Nachyn Kýýlar (65 kelige deıin).
Tuǵyrǵa kóterile almaǵandar: Mereı Bazarbaev (57 kelige deıin), Asyljan Esengeldi (61 kelige deıin), Ádil Ospanov pen Osimjan Dastanbek (65 kelige deıin), Maıys Álıev, Oljas Oljaqanov pen Sanjar Dosjanov (70 kelige deıin), Darhan Esenǵalı men Qýandyq Shaldar (74 kelige deıin), Abylaıhan Územbaev, Bolat Saqaev pen Rústem Myrzaǵalıev (86 kelige deıin).
«Imre Poııak, Ianosh Varga jáne Ishtvan Kozma memorıaly» týrnıri Býdapeshte 15-19 shilde aralyǵynda ótýde. Barlyǵy 30 júlde jıyntyǵy oınatylady: grek-rım, erkin jáne áıelder kúresinen on-onnan.