Qazaqstan ulttyq quramasynyń grek-rım kúresinen ókilderi Japonıada ótip jatqan 2026 jylǵy jazǵy Azıa oıyndarynyń medal saıystaryna shyqty, dep habarlaıdy infohub.kz saıty.
Qola júlde úshin Meıirjan Shermahanbet pen Shamıl Ojaev kúresedi. 67 kelige deıingi salmaq dárejesinde Shermahanbet jartylaı fınalda Japonıa ókili Kótaro Sogabemen kezdesip, alań ıesine 0:8 esebimen jol berdi — japon balýany tehnıkalyq basymdyq arqyly merziminen buryn jeńiske jetti.
Jeńiliske qaramastan, qazaqstandyq júlde úshin kúresin jalǵastyrady. Búgin úshinshi oryn úshin ótetin beldesýde onyń qarsylasy Mońǵolıa ókili Ganbaıar Namsraı bolady.
Taǵy bir qazaqstandyq Shamıl Ojaev 87 kelige deıingi salmaq dárejesinde óner kórsetedi. Jartylaı fınalda ol Qyrǵyzstannyń Asan Janyshovymen kezdesip, beldesý qyrǵyzstandyq sportshynyń 6:1 esebimen jeńisimen aıaqtaldy.
Endi Ojaev ta Azıadanyń qola medali úshin kúresedi. Úshinshi oryn úshin sheshýshi beldesýde qazaqstandyqqa Ózbekstannyń Jalǵasbaı Berdimuratov qarsy turady.
Shermahanbet pen Ojaevtyń qatysýymen ótetin medal saıystary Nagoya City Inae Sports Center-de ótedi.
Sondaı-aq, bul kúni Qazaqstannyń basqa da ókilderi jubanysh beldesýleri arqyly qola júlde úshin kúresti jalǵastyrdy. Oljas Syrlybaı 130 kelige deıingi salmaq dárejesinde ońtústikkoreıalyq Kım Mın Sokqa 1:6 esebimen jol berse, Jamılá Bakbergenova 68 kelige deıingi salmaqta Mońǵolıa ókili Delgermaa Enhsaıhanǵa 0:6 esebimen utyldy. Osylaısha, olar týrnırdegi ónerlerin aıaqtady.