Bıylǵy jyldyń birinshi jartyjyldyǵynyń qorytyndysy boıynsha Qazaqstanda júrek-qan tamyrlary aýrýlarynan, onkologıadan jáne jol-kólik oqıǵalarynan bolatyn ólim-jitimniń tómendegeni tirkeldi, sondaı-aq ana men bala densaýlyǵynyń kórsetkishteri jaqsardy, dep habarlaıdy infohub.kz saıty.
Densaýlyq saqtaý birinshi vıse-mınıstri Tımýr Sultanǵazıevtiń vedomstvo alqasynda málimdegenindeı, jeti aı ishinde ana ólimi 17,5%-ǵa, qan aınalymy júıesi aýrýlarynan bolatyn ólim 10,9%-ǵa, onkologıalyq aýrýlardan 5%-ǵa, al JKO saldarynan 20,9%-ǵa azaıdy. Jalpy halyq ólimi 0,8%-ǵa tómendedi.
Sultanǵazıevtiń aıtýynsha, osy kezeńde ana ólimi kórsetkishi 100 myń tiri týylǵan nárestege shaqqanda 9,7-den 8,0-ge deıin tómendedi, náreste ólimi jospardaǵy 7,3-tiń ornyna 5,93-ti qurady, al neonataldyq ólim jospardaǵy 4,1-diń ornyna 3,05 boldy.
Ekinshi jartyjyldyqta júktilik asqynýlarynyń aldyn alýǵa, baqylaý sapasyna, patronajǵa jáne ýaqtyly medısınalyq kómek kórsetýge basty nazar aýdarý josparlanýda. Sonymen qatar, vedomstvo aýrýlardy erte anyqtaý kórsetkishteri tómen jáne pasıentterdi marshrýttaýda problemalar bar óńirlerde onkoskrınıngtermen qamtýdy kúsheıtýdi nıettenýde.
«Jyl qorytyndysy boıynsha sebepterdi túsindirý emes, kórsetkishterdiń naqty jaqsarýy jáne halyq úshin naqty nátıje qajet bolady», — dep atap ótti Sultanǵazıev.
Buǵan deıin 2026 jyldyń alǵashqy úsh aıynda ana ólimi ótken jyldyń sáıkes kezeńimen salystyrǵanda 43%-ǵa tómendegeni, al náreste ólimi 1000 jańa týǵan nárestege shaqqanda 5,92-den 5,56-ǵa deıin tómendegeni habarlanǵan bolatyn.