Qazaqstan óz pozısıasyn Forbes-2026 jahandyq mıllıarderler reıtıńinde nyǵaıtty. Planetadaǵy eń baı adamdar tizimine alǵash ret qazaqstandyq eki kásipker – Nurlan Smaǵulov pen Aıdyn Rahımbaev endi, dep habarlaıdy infohub.kz.
Eki bıznesmen de $1 mlrd mejesinen asty. Bul – Forbes jahandyq reıtıńine ený úshin mindetti shart. Bıyl tizimge álemniń 3400-den astam mıllıarderi qosyldy.
Astana Group holdıńiniń negizin qalaýshy ári prezıdenti Nurlan Smaǵulov jahandyq reıtıńke alǵash ret endi. Forbes onyń baılyǵyn $1,3 mlrd dep baǵalap, 2858-orynǵa qoıdy. Kásipker bıznesin 1992 jyly Astana Motors avtosalonyn ashýdan bastaǵan. Qazir kompanıa onnan astam avtomobıl brendiniń resmı dıleri jáne dıstrıbútory, sonymen qatar jeńil jáne komersıalyq kólikter óndiredi. Avtomobıl bıznesinen bólek, Smaǵulov komersıalyq jyljymaıtyn múlikke belsendi ınvestısıa salady: 2006 jyly Qazaqstandaǵy alǵashqy zamanaýı saýda-oıyn saýyq ortalyqtarynyń biri – MEGA-ny ashqan. 2025 jyly bıznesmen taǵy bir aýqymdy jobany júzege asyryp, Almaty óner murajaıyn ashty. Bul – eldegi zamanaýı ónerdiń alǵashqy jeke murajaıy. Ony qurýǵa salynǵan ınvestısıa $120 mln-nan asty.
Reıtıńtiń taǵy bir jańa qatysýshysy – BI Group seriktesi ári negizgi aksıoneri Aıdyn Rahımbaev. Forbes onyń baılyǵyn $1,1 mlrd dep baǵalap, 3185-orynǵa qoıdy. BI Group 1980-jyldardyń aıaǵynda qurylyp, ýaqyt óte Qazaqstannyń eń iri qurylys jáne developerlik kompanıasyna aınaldy. Búginde holdıń tek el ishinde ǵana emes, Ózbekstan, AQSh, Birikken Arab Ámirlikteri jáne Ázirbaıjanda da jobalardy júzege asyrady. Bıznesten bólek, Rahımbaev IQanat bilim berý jobasynyń negizin qalaýshylardyń biri. Bul jobanyń qyzmeti Garvard bıznes mektebiniń zertteý nysanyna aınalǵan.
Jańa mıllıarderlerdiń paıda bolýyna qaramastan, Kaspi.kz dırektorlar keńesiniń tóraǵasy Vácheslav Kım elimizdiń eń baı bıznesmeni bolyp qalady. Forbes dereginshe, onyń baılyǵy $7,8 mlrd-qa jetip, álemdik reıtıńte 477-oryn alǵan. Salystyrý úshin, bir jyl buryn onyń kapıtaly shamamen $7,1 mlrd bolǵan. Qazaqstandyq kásipkerler arasynda ekinshi orynda – Vladımır Kım. Onyń baılyǵy $5,9 mlrd-qa artyp, 712-orynǵa kóterilgen. Keıingi oryndarda Tımýr Qulybaev pen Dınara Qulybaeva. Olardyń árqaısysynyń baılyǵy $5,4 mlrd shamasynda jáne reıtıńte 780-orynda tur. Bolat Ótemuratov ótken jyldaǵy $3,7 mlrd-tan $5,4 mlrd-qa deıin aktıvterin ulǵaıtqan. Freedom Holding negizin qalaýshy Tımýr Turlovtyń kapıtalynda azdaǵan tómendeý baıqaldy: $5,8 mlrd-tan $5,2 mlrd-qa – ol 823-oryndy ıelendi. Tizimge sondaı-aq Vácheslav Kımniń isker seriktesi Mıhaıl Lomtadze $6 mlrd baılyǵymen engen, alaıda Forbes ony Grýzıa kásipkeri retinde qarastyrady.
Álemdik Forbes reıtıńiniń kóshbasshysy qaıtadan Ilon Mask boldy. Basylymnyń baǵalaýynsha, onyń baılyǵy eki eseden astam ósip, $839 mlrd-qa jetken. Planetadaǵy eń baı bes adamnyń qataryna sondaı-aq Larrı Peıdj ($257 mlrd), Sergeı Brın ($237 mlrd), Djeff Bezos ($224 mlrd) jáne Mark Sýkerberg ($222 mlrd) engen.