2026 jyldyń shildesinen bastap Qazaqstan azamattary Indonezıaǵa vızasyz kirip, onda 30 kúnge deıin bola alady. Sapar úshin ulttyq pasport pen elektrondyq deklarasıa jetkilikti, dep habarlaıdy infohub.kz saıty.
Tıisti sheshimdi Indonezıanyń Syrtqy ister mınıstrligi qabyldady. Vızasyz rejım ózara negizde áreket etedi: buǵan deıin Qazaqstan Indonezıa azamattaryna elimizge vızasyz kirip, aýmaǵynda 30 kúnge deıin bolý múmkindigin bergen.
«Vızasyz kirý týraly sheshim qabyldaǵan kezde ındonezıalyq tarap ózaralyq qaǵıdatyn da eskerdi. Qazaqstan buǵan deıin Indonezıa azamattaryna elimizge vızasyz kirip, 30 kúnge deıin bolý quqyǵyn bergen. Osylaısha, eki eldiń ulttyq pasport ıeleri úshin 30 kúnge deıingi merzimge vızasyz rejımder qoldanylady. Indonezıalyq tarap belgilegen sharttar boıynsha vızasyz rejım tegin jáne bir rettik kirýdi kózdeıdi. Eń uzaq bolý merzimi kelgen kúnnen bastap 30 kúndi quraıdy», — delingen habarlamada.
Sonymen qatar azamattar Indonezıaǵa kirý kezinde qoldanylatyn jalpy talaptardy eskerýi kerek. «2025 jyldyń 1 qazanynan bastap shetelden kelgen barlyq jolaýshy «All Indonesia» biryńǵaı elektrondyq deklarasıasyn toltyrýǵa mindetti. Deklarasıa tegin toltyrylady jáne ony aldyn ala rásimdeýge bolady», — dep qosty vedomstvo.
Buǵan deıin Indonezıa parlamenti sheteldikterge baqylaýdy kúsheıtýge shaqyrǵany habarlanǵan.