Qazaqstan jarty jyl ishinde ınvestısıalyq reıtıńte 17 satyǵa kóterilip, 150 memlekettiń arasynda 53-shi orynǵa jaıǵasty. Bul — 2026 jylǵy mamyrdaǵy Safest Countries for Investors reıtıńiniń qorytyndysy, dep habarlaıdy infohub.kz saıty.
2025 jyldyń qazanynda respýblıka 70-shi orynda bolǵan edi. Mundaı nátıje eldiń ekonomıkalyq turaqtylyǵyna halyqaralyq senimniń artqanyn jáne makroekonomıkalyq turaqtylyqty qamtamasyz etý, ınstıtýttardy damytý men qolaıly ınvestısıalyq ahýal qalyptastyrý saıasatynyń tıimdiligin kórsetedi. Qazaqstan aımaqta kóshbasshylyǵyn saqtap, Ortalyq Azıanyń barlyq elderinen, sondaı-aq ekonomıkasy iri birqatar memleketterden ozyp tur.
Bul reıtıńtiń ereksheligi — tartylǵan ınvestısıa kólemine emes, uzaq merzimdi ekonomıkalyq turaqtylyq pen memlekettik ınstıtýttar turǵysynan salym qaýipsizdiginiń deńgeıine baǵa berýinde. Ádisteme makroekonomıkalyq turaqtylyq, memlekettik basqarý sapasy, saıası jáne valútalyq táýekelder, retteýshi ortanyń tıimdiligi, sondaı-aq ekonomıkanyń syrtqy daǵdarystarǵa tótep berý qabileti sıaqty keń aýqymdy faktorlardy eskeredi. Qazaqstannyń joǵary serpini halyqaralyq ınvestorlardyń eldi boljamdy ári salystyrmaly túrde turaqty ıýrısdıksıa retinde qabyldaıtynyn kórsetedi.
Qazaqstannyń ınvestısıalyq tartymdylyǵyn odan ári nyǵaıtý memlekettik ınstıtýttar sapasyn júıeli túrde arttyrýǵa, ınvestorlardy qorǵaý tetikterin jetildirýge jáne bıznes júrgizýdiń ashyq jaǵdaıyn qamtamasyz etýge baılanysty. Oń serpinniń saqtalýy eldiń halyqaralyq reıtıńterdegi ornyn jaqsartyp qana qoımaı, sheteldik kapıtal tarapynan senim deńgeıin arttyryp, Qazaqstannyń turaqty ekonomıkalyq ósýi men jahandyq ınvestısıalyq naryqtaǵy básekege qabilettiligin nyǵaıtýǵa qosymsha faktor bolady.