Qazaqstanda sońǵy úsh jylda onkologıalyq aýrýlardan bolatyn ólim-jitim 26,6%-ǵa tómendep, pasıentterdiń bes jyldyq ómir súrý kórsetkishi 65%-ǵa jetti, dep habarlaıdy infohub.kz.
Respýblıkanyń Densaýlyq saqtaý mınıstrligi qaterli isikpen kúreste birneshe negizgi kórsetkishtiń jaqsarǵanyn atap ótti. Ólim-jitimniń azaıýy men ómir súrý uzaqtyǵynyń artýymen qatar, erte dıagnostıkada da oń dınamıka baıqalady: erte kezeńde anyqtalǵan jaǵdaılardyń úlesi 36,8%-ǵa deıin ósti, al aýrýdyń asqynǵan túrleriniń sany 7,5%-ǵa azaıdy.
«Sońǵy úsh jylda erte kezeńde anyqtalǵan qaterli isik jaǵdaılarynyń úlesi 6,1%-ǵa – 36,8%-ǵa deıin ósti, al onkologıanyń asqynǵan jaǵdaılarynyń sanyn 7,5%-ǵa tómendetýge qol jetkizildi», – delingen vedomstvo habarlamasynda.
Qazirgi ýaqytta dınamıkalyq baqylaýda 246 myń pasıent tur. Elimizde jyl saıyn onkologıalyq aýrýlardyń 43 myńǵa jýyq jańa jaǵdaıy anyqtalady.
Mınıstrlikte qol jetkizilgen nátıjeler Qazaqstanǵa Ortalyq Azıa elderi arasyndaǵy pozısıasyn nyǵaıtýǵa jáne qaterli isikpen kúrestiń negizi erte dıagnostıka men zamanaýı emdeý ádisteri bolyp tabylatyn EYDU elderiniń deńgeıine birtindep jaqyndaýǵa múmkindik beretinin aıtady.
«Biz árbir pasıent turǵylyqty jerine qaramastan sapaly onkologıalyq kómek ala alatyn júıeni dáıekti túrde quryp jatyrmyz. Bul birjolǵy sheshimder emes, naqty nátıje berip jatqan uzaq merzimdi ózgerister», – dep atap ótti densaýlyq saqtaý mınıstri.
Densaýlyq saqtaý mınıstrliginde onkologıalyq qyzmetti jańǵyrtý memleket basshysynyń tapsyrmalaryn oryndaý maqsatynda júzege asyrylyp jatqan Onkologıalyq aýrýlarmen kúres jónindegi keshendi jospar aıasynda júrgizilip jatqanyn qosymsha aıtty.