Qazaqstan prezıdentine degen senim deńgeıi 86,9%-ǵa jetti, dep habarlaıdy infohub.kz saıty.
Áleýmettanýshylardyń dereginshe, saýalnamaǵa qatysqandardyń 84,1%-y Qazaqstandaǵy qoǵamdyq-saıası jaǵdaıdy turaqty nemese qolaıly dep baǵalaǵan. Birinshi toqsanda bul kórsetkish 70,4% bolǵan eken.
Zertteý nátıjesinde respondentterdiń 85,8%-y óz ómirine qanaǵattanǵanyn, al 50,5%-ynyń sońǵy bir jylda materıaldyq jaǵdaıy jaqsarǵanyn kórsetti. 18-28 jas aralyǵyndaǵy jastardyń 87,1%-y eldegi ahýaldy turaqty dep sanasa, 65,6%-y aldaǵy bir jylda ómiriniń jaqsaratynyna úmittenedi.
QIOZ-dyń jeke zertteýi saıası basymdyqtarǵa arnalǵan. Respondentterdiń 75,1%-y Quryltaı saılaýyna qatysýǵa daıyn ekenin bildirgen. Onyń ishinde 37,6%-y saılaý ýchaskesine sózsiz baratynyn, taǵy 37,5%-y daýys berýge beıim ekenin aıtqan.
QIOZ mamandary birinshi toqsanda 2400 adam, ekinshi toqsanda 1200 adam suralǵanyn atap ótti. Uıymdastyrýshylardyń aıtýynsha, nátıjeler Quryltaı saılaýy qarsańynda memlekettik ınstıtýttarǵa degen senimniń joǵary ekenin kórsetedi.
Budan buryn Ortalyq saılaý komısıasynyń tóraǵasy Shavkat Ótemisov 23 tamyzǵa josparlanǵan parlamenttik saılaýǵa qatysatyn saıası partıalar úshin saılaý jarnasynyń mólsherin aıtqan bolatyn.