Qazaqstan Qytaı Halyq Respýblıkasynyń Shanhaı yntymaqtastyq uıymynyń (SHYU) Damý bankin qurý bastamasyn resmı túrde qoldady. Bul týraly Prezıdent Qasym-Jomart Toqaev Bishkekte ótken SHYU-ǵa múshe memleketter basshylary keńesiniń otyrysynda málimdedi, dep habarlaıdy infohub.kz.
Memleket basshysy áriptesteri aldynda sóılep, uıym aıasynda tolyqqandy ınvestısıalyq kontýr qalyptastyrý qajettigin atap ótti. «Shanhaı ondyǵy» elderiniń ózara taýar aınalymy 1 trıllıon dollarǵa jaqyndaǵanyna qaramastan, ekonomıkalyq ózara baılanys áleýeti tolyq ashylmaǵan.
Mamandandyrylǵan qarjy ınstıtýtynyń iske qosylýy múshe elderdiń ýaǵdalastyqtaryn naqty ónerkásiptik jáne ınfraqurylymdyq jobalarǵa aınaldyrýǵa múmkindik beredi.
«Qazaqstan Qytaıdyń SHYU Damý bankin qurý bastamasyn qoldaıdy. Bul banktiń resýrstaryn eń aldymen ınfraqurylymdyq, tehnologıalyq jáne ónerkásiptik jobalarǵa baǵyttaǵan jón dep sanaımyz. Al múshe memleketterdiń ortaq kelisimi bolǵan jaǵdaıda, Qazaqstan bul ınstıtýtty, onyń shtab-páterin óz elinde qabyldaı alar edi», — dedi ol.
Damý bankin iske qosýdan bólek, Qazaqstan Prezıdenti pılottyq ındýstrıalyq konsorsıýmdar tetigin engizýdi usyndy. Bul format elderge uıymnyń barlyq músheleri qosylǵansha kútpeı-aq, daıyndyǵyna qaraı birlesken ekonomıkalyq jobalardy bastaýǵa, al tabysty bastamalardy keıin keńeıtýge múmkindik beredi.
Sondaı-aq, bolashaq bank jumysyn jandandyrýdaǵy mańyzdy qadam — qoldanystaǵy shekara mańy yntymaqtastyq ortalyqtarynyń bazasynda transshekaralyq saýda aımaqtaryn qurý. Bul jeńildetilgen taýar almasýdy, sıfrlyq rásimderdi jáne ózara esep aıyrysýdyń zamanaýı tetikterin synaqtan ótkizýge múmkindik beredi.