2026 jyldan bastap qazaqstandyq mektepterde oqýshylardyń bilimin baǵalaý tásili ózgeredi. Oqý-aǵartý mınıstrligi bastaýysh synyptardaǵy dástúrli BJB men TJB-dan bas tartýdy kózdeıtin buıryq jobasyn ázirledi. Qujat «Ashyq NQA» portalynda qoǵamdyq talqylaýǵa usynyldy, dep habarlaıdy infohub.kz saıty.
Jobaǵa sáıkes, 2–4 synyp oqýshylary úshin bólim men toqsan boıynsha jıyntyq baǵalaýdyń ornyna qalyptastyrýshy baǵalaý, sondaı-aq taqyryptyq jáne qorytyndy baqylaý jumystary engiziledi. Bul oqýshylardyń úlgerimin neǵurlym ıkemdi baǵalaýǵa jáne stresstik júktemeni azaıtýǵa múmkindik beredi.
5–11 (12) synyp oqýshylary úshin ádettegi júıe saqtalady: bilim sabaqtaǵy kúndelikti jumys jáne jıyntyq baǵalaý (BJB men TJB) arqyly tekseriledi. Qujatta toqsandyq baǵalar baǵalaý nátıjeleriniń negizinde qoıylatyny atap kórsetilgen, bul oqý jetistikterin baǵalaýdyń obektıvtiligin qamtamasyz etedi.
Oqý-aǵartý mınıstrligi jańa erejeler baǵalaý júıesin neǵurlym ashyq ári obektıvti etedi dep esepteıdi. Buıryq jobasy 2026 jyldyń 21 tamyzyna deıin talqylaýda bolady.
Buǵan deıin vedomstvo basshysy Juldyz Súleımenova qoldanystaǵy ádistemelerdiń kemshilikterin moıyndap, ádettegi baqylaý jumystaryn kóbirek engizetinin aıtqan bolatyn. Sondaı-aq depýtattar mektepterde BJB men TJB-ny engizgenderdi jaýapqa shaqyrǵany habarlanǵan.