Qazaqstan ushqyshsyz ushaqtar shabýylyna baılanysty ýaqytsha toqtatylǵan Kaspı qubyr konsorsıýmy (KQK) arqyly munaı eksportyn qaıta bastady, dep habarlaıdy infohub.kz saıty.
Qazaqstan Respýblıkasy Energetıka mınıstrliginiń baspasóz qyzmetiniń habarlaýynsha, KQK júk jóneltýshilerden munaı qabyldaýdy jáne Novorossısk portyndaǵy teńiz termınaly arqyly tıeý operasıalaryn qaıta bastady. «Qazirgi ýaqytta KQK-tiń eki syrtqy aılaq qurylǵysynda SEAMAJESTY jáne MILOS tankerlerine tıeý júrgizilýde. Eki keme de «Teńizshevroıl» JSHS munaıyn qabyldap jatyr. Munaı qabyldaýdyń qaıta bastalýy munaı óndirýshi kompanıalarǵa shıkizatty qubyr júıesine jetkizýdi jalǵastyrýǵa jáne teńiz termınaly arqyly eksporttyq operasıalardy qaıta bastaýǵa múmkindik beredi», — delingen vedomstvo habarlamasynda.
Teńiz termınalyndaǵy odan ári operasıalar qazirgi jaǵdaıdy baǵalaý jáne qajetti qaýipsizdik talaptaryn eskere otyryp júrgiziletini atap ótildi. «Qazaqstan Respýblıkasy Energetıka mınıstrligi KQK basshylyǵymen, iri júk jóneltýshilermen jáne prosestiń basqa da qatysýshylarymen turaqty baılanysta. Vedomstvo jaǵdaıdy baqylap, qazaqstandyq munaıdyń odan ári tasymaldanýyn qamtamasyz etýge baǵyttalǵan is-sharalardy úılestirýdi jalǵastyrýda», — dep naqtylady baspasóz qyzmeti.
Eske salaıyq, 20 shildede KQK teńiz termınalynda tıeý kezinde turǵan «NELSA» tankeri taǵy da shabýylǵa ushyrady. Ushqyshsyz ushaq soqqysynan kemede órt shyqty. Buǵan deıin KQK teńiz termınalyna ushqyshsyz ushaqtar shabýyl jasaǵanyn, sonyń saldarynan munaı tıeý toqtatylǵanyn habarlaǵan bolatyn. 23 shildede Energetıka mınıstrligi Qara teńiz akvatorıasynda kemelerdiń, ekıpajdardyń qaýipsizdigin jáne ekologıany qamtamasyz etý maqsatynda KQK teńiz termınalynda tıeý operasıalaryn toqtatqanyn málimdedi.