1 qazanda Kalıfornıadaǵy Vandenberg bazasynan Ilon Mask negizin qalaǵan SpaceX kompanıasynyń zymyranymen ǵaryshqa qazaqstandyq oqýshylar jasaǵan spýtnık ushyryldy, dep habarlaıdy infohub.kz saıty.
Astana qalasynyń Nura aýdanyndaǵy Nazarbaev Zıatkerlik mektebiniń oqýshylary jasaǵan NIS PocketQube pıkospýtnıgi týraly aıtylyp otyr. NZM málimetinshe, apparattyń orbıtaǵa shyǵýy oqýshylardy, ustazdardy jáne Qazaqstan men sheteldiń ǵarysh salasy mamandaryn biriktirgen kópjyldyq bilim berý jáne ınjenerlik jobanyń nátıjesi boldy.
Joba boıynsha jumys 2019 jyly oqýshylar ǵarysh tehnologıalaryn tek teorıalyq turǵydan ǵana emes, naqty ǵarysh apparatymen jumys isteı alatyn bilim berý ortasyn qurý ıdeıasynan bastaldy. Belsendi kezeń 2020 jyly mektepte NIS Space ǵarysh zerthanasy ashylyp, 7–10 synyp oqýshylaryna arnalǵan «Ǵarysh tehnıkasynyń elektronıkasy» arnaıy kýrsy iske qosylǵanda bastaldy.
«NIS PocketQube — PocketQube formatyndaǵy asa shaǵyn spýtnık. Onyń ólshemderi 5×5×5 sm, salmaǵy 250 g. Shaǵyn formatqa qaramastan, apparat borttyq basqarý, elektr qorektendirý jáne radıobaılanys júıelerimen, sondaı-aq kún panelderimen jabdyqtalǵan», — dep qosty mektepte.
Jobany iske asyrý barysynda NIS PocketQube komandasyna mekteptiń 17 oqýshysy qatysty, olardyń bir bóligi búginde NZM túlekteri.
«Olar spýtnıkti 3D-modeldeýmen aınalysyp, jabdyqtyń ornalasýyn eseptep, elektrondyq platalarmen jáne SMD-komponenttermen jumys istedi, mıkrokontrollerlerdi baǵdarlamalady, Python tilinde derekterdi óńdeý algorıtmderin ázirledi jáne apparatty jerdegi synaqtarǵa daıyndaýǵa qatysty. Birneshe jyl ishinde komanda shaǵyn ǵarysh apparatyn jasaýdyń alǵashqy syzbalar men prototıpterden bastap synaqtar men ushý úlgisin ushyrýǵa daıyndaýǵa deıingi tolyq sıklin derlik ótti. 2022 jyldyń jeltoqsanynda apparat Ulttyq ǵarysh ortalyǵy bazasynda jerdegi termovakýýmdyq jáne mehanıkalyq synaqtardan ótti», — dep atap ótti NZM-de.
Spýtnıkten alynǵan málimetterdi oqýshylardyń fızıka, astronomıa, baǵdarlamalaý jáne ınjenerlik pánder boıynsha zertteý jobalarynda paıdalaný josparlanýda. Aqparatty qabyldaý jáne óńdeý úshin Qazaqstannyń barlyq óńirlerindegi oqýshylarǵa spýtnıktik derekterge qoljetimdilikti qamtamasyz etetin jerdegi keshen ornatylady.