Batys Qazaqstan oblysyndaǵy «Syrym» veterınarlyq baqylaý beketinde ónim tasymaldaý kezinde birqatar zańbuzýshylyq anyqtaldy — júk kólikteri Qazaqstan aýmaǵyna jiberilmedi, dep habarlaıdy infohub.kz saıty.
Aýyl sharýashylyǵy mınıstrliginiń málimetinshe, Reseıden kelgen bıdaı kebekteri men muzdatylǵan qoı etin tasymaldaý kezinde veterınarıalyq-sanıtarıalyq talaptar saqtalmaǵan.
Birinshi jaǵdaıda Reseı Federasıasynyń Ýlánovsk oblysynan Túrkistan oblysyna 40 tonna bıdaı kebegi tasymaldanǵan. Tekserý barysynda veterınarıalyq ilespe qujattardyń, ónimniń termıalyq óńdelýiniń jáne tańbalanýynyń joqtyǵy anyqtaldy.
«Taǵy bir jaǵdaıda Ýlan-Batordan (Mońǵolıa) Dýshanbege (Tájikstan) 20 tonna muzdatylǵan qoı eti tasymaldanǵan. Epızootıalyq ahýaly nashar bolýyna baılanysty shekteýler engizilgen Reseı Federasıasynyń aýmaqtarynan Qazaqstan aýmaǵy arqyly osy ónimdi tranzıttik ótkizýge ýaqytsha shekteýler qoldanylǵany anyqtaldy», — dedi vedomstvodan.
Nátıjesinde júk kólikteri jóneltilgen baǵytqa qaıtaryldy. Júrgizýshilerge Qazaqstan Respýblıkasynyń Ákimshilik quqyq buzýshylyq týraly kodeksiniń 406-baby boıynsha ákimshilik hattamalar toltyrylyp, aıyppul salyndy. Júk tasymaldaýshylarǵa Eýrazıalyq ekonomıkalyq odaqtyń veterınarıalyq-sanıtarıalyq talaptary túsindirildi.
Aýyl sharýashylyǵy mınıstrligi jyl basynan beri osy bekette 249 zańbuzýshylyq anyqtalǵanyn qosty: 249 júk avtokóligi jóneltilgen baǵytqa qaıtaryldy, 117 adamǵa ákimshilik hattamalar toltyrylyp, aıyppul salyndy.
Vedomstvo júk tasymaldaýshylar men syrtqy ekonomıkalyq qyzmetke qatysýshylardy Qazaqstan Respýblıkasynyń jáne Eýrazıalyq ekonomıkalyq odaqtyń veterınarıalyq-sanıtarıalyq talaptaryn saqtaýǵa shaqyrdy.