2026 jyldyń birinshi toqsanynyń qorytyndysy boıynsha Qazaqstandaǵy jaldamaly jumysshylar sany 150 myńǵa jýyq ósip, 7,29 mln adamǵa jetti. Jalpy jumys kúshiniń sany 9,5 mln-ǵa jýyqtady, al ózin-ózi jumyspen qamtyǵandar sany 2,1 mln-ǵa, táýelsiz jumysshylar sany 326,6 myńǵa deıin qysqardy. Osylaısha, azamattar ekonomıkanyń resmı sektoryna belsendi túrde aýysyp, medısınalyq saqtandyrý men áleýmettik tólemderdi qosa alǵanda, áleýmettik kepildikterge ıe bolýda ... dep habarlaıdy infohub.kz saıty.
QR Eńbek jáne halyqty áleýmettik qorǵaý mınıstrligi: "Resmı jumyspen qamtýdyń ósýi – ekonomıka turaqtylyǵynyń mańyzdy kórsetkishteriniń biri. Eńbek sharty boıynsha jumys isteý azamattarǵa mindetti áleýmettik saqtandyrý, zeınetaqy jınaqtary, aqyly eńbek demalysy, ýaqytsha eńbekke jaramsyzdyq boıynsha járdemaqylar jáne eńbek quqyqtaryn qorǵaý sıaqty tolyq áleýmettik jáne eńbek kepildikterin beredi", – dep málimdedi.
Vedomstvonyń málimetinshe, eńbek naryǵyna qosymsha serpin jumyspen qamtýdyń belsendi sharalary berýde. 1 shildedegi jaǵdaı boıynsha memleket 249 599 qazaqstandyqqa jumysqa ornalasýǵa kómektesken, onyń shamamen 96 415-i turaqty jumys tapqan.
Mınıstrlik eńbek naryǵyn odan ári damytý jumyspen qamtý sapasyn arttyrýǵa, zamanaýı jumys oryndaryn qurýǵa, adamı kapıtaldy damytýǵa jáne azamattardyń resmı jumysqa ornalasý múmkindikterin keńeıtýge baǵyttalatynyn atap ótti.
Buǵan deıin Qazaqstandaǵy jumyssyzdyq deńgeıi 4,5% quraǵany – jalpy 446 myńǵa jýyq jumyssyz azamat bolǵany habarlanǵan bolatyn. Sondaı-aq «sur» jalaqynyń taralýy jáne ortasha resmı jalaqy týraly derekter jarıalandy.