Nagoıada ótip jatqan X Jazǵy Azıa oıyndarynda qazaqstandyq sablıster komandalyq saıysta qola medal jeńip aldy. Qurama sapynda Artem Sarkısán, Nurmuhammed Jaılybaı, Nazarbaı Sattarhan jáne Qýanysh Erǵashbaı óner kórsetti. Sarkısán úshin bul — atalmysh jarystaǵy ekinshi qola júlde, dep habarlaıdy infohub.kz saıty.
Qazaqstandyq sablıster pedestalǵa qaraı alǵashqy aınalymda Saýd Arabıasy quramasyn senimdi túrde jeńýden bastady — 45:32. Shırek fınalda bizdiń qylyshshylar Qytaı komandasyn 45:40 esebimen tize búktirip, keminde qola júldege qol jetkizdi. Alaıda fınalǵa joldamany sheshken jartylaı fınalda qazaqstandyqtar Japonıa quramasyna 34:45 esebimen jol berdi.
Medaldan bir qadam qalǵanda qazaqstandyq rapırashy qyzdar toqtady. Sofıa Aqtaeva, Alına Iskanderova jáne Alena Gnoeva tartysty básekede Qytaı qarsylastaryna 36:40 esebimen utyldy.
Aǵymdaǵy týrnır bastalǵanǵa deıin Qazaqstannyń Azıadalardaǵy qylysh sportyndaǵy qorjynynda úsh altyn, tórt kúmis jáne 13 qola medal bolǵan. Nagoıadaǵy on tórtinshi qolany Sarkısán jeńip aldy, on besinshisin shpagashy qyzdar quramasy, on altynshysyn sablıster quramasy ákeldi. Kırıll Prohodovtyń Azıada-2026-daǵy medali qazaqstandyq komandanyń besinshi kúmis júldesi boldy.
Azıa oıyndarynyń chempıony atanyp, shpagashylar quramasy eki ret top jarǵan — 1994 jáne 2002 jyldary. Dál osy qarý túrinen Dmıtrı Aleksanın Azıada-2018-de jeńiske jetken bolatyn.
X Jazǵy Azıa oıyndary resmı túrde 19 qyrkúıekte ashylyp, 4 qazanda máresine jetedi. Jarysqa 45 eldiń sportshylary qatysyp, 460 komplekt júlde sarapqa salynýda. Azıada-2026-da Qazaqstan quramasynyń namysyn 35 sport túrinen 558 sportshy qorǵaýda.
Oıyndardyń birinshi kúni qazaqstandyqtar tórt altyn medal jeńip aldy. Chempıon atanǵandar: veloshabandozdar Rınata Sýltanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva. Qurama qorjynyna besinshi altyndy MMA saıyskeri Erkinǵalı Búrkitalın, altynshysyn onyń aralas jekpe-jektegi komandalasy Qadyrbek Shynbaev saldy. 23 qyrkúıekte Lýsenko Azıada-2026-nyń eki dúrkin chempıony atandy. Segizinshi joǵary synaptaǵy medaldi 24 qyrkúıekte eskekshiler Vladıslav Iakovlev pen Ivan Chernýhın erler arasyndaǵy juptyq esý saıysynda jeńip aldy.
Oıyndardyń alty kúninen keıin Qazaqstan beıresmı medal esebinde tórtinshi orynda tur.