Qazaqstannyń shokolad naryǵy áli de ımportqa táýeldi. 2026 jylǵy qańtar-mamyr aılarynda sheteldik jetkizilimderdiń úlesi jalpy resýrstyń 60%-yn qurady. Importtyq shokolad baǵasynyń ósýi ónimniń qymbattaýynyń negizgi faktorlarynyń biri bolyp otyr, dep habarlaıdy infohub.kz.
Import Qazaqstan naryǵyn shokoladpen jáne qantty kondıterlik ónimdermen qamtamasyz etýde áli de mańyzdy ról atqarady. 2026 jyldyń qańtar-mamyrynda ımporttyń úlesi 60%-dy qurady, bul byltyrǵy 60,5%-ben salystyrǵanda shamaly ǵana tómendegen. Jalpy resýrs kólemi 97,5 myń tonna bolsa, onyń 58,5 myń tonnasy sheteldik jetkizilimderge tıesili.
Otandyq óndiris 14,1%-ǵa artyp, 39 myń tonnaǵa jetkenimen, onyń jalpy resýrstaǵy úlesi shamamen 40%-da qalyp otyr. Bul naryqtyń ımportqa táýeldiligi saqtalǵanyn kórsetedi.
Ulttyq statısıka búrosynyń dereginshe, sońǵy jyldary ımporttyń ishki naryqtaǵy orny birtindep nyǵaıyp keledi: 2020 jyly onyń úlesi 50,6% bolsa, 2025 jyldyń qorytyndysy boıynsha 61,8%-ǵa jetken.
Qazaqstanǵa shokolad pen kakao qosylǵan daıyn ónimderdiń negizgi jetkizýshisi Reseı bolyp qalady. 2026 jyldyń qańtar-mamyrynda Reseıdiń úlesi ımporttyń 73,6%-yn qurady. Aıta ketý kerek, bul ónimder ımporttyq shıkizattan óńdelgen, óıtkeni kakao burshaqtary Reseıde de, Qazaqstanda da óndirilmeıdi. Osylaısha, óndirýshiler arasyndaǵy báseke sheteldik shıkizatqa birdeı táýeldilik jaǵdaıynda júredi.
Statısıka kórsetkendeı, Qazaqstanda shokoladtyń qymbattaýyna TMD elderinen ımporttalatyn ónimderdiń áseri zor. 2026 jyldyń qańtar-mamyrynda ımporttyq shokolad baǵasynyń ındeksi ótken jyldyń sáıkes kezeńimen salystyrǵanda 139,9%-dy qurady. TMD elderinen keletin ónimder boıynsha bul kórsetkish 143,2%-ǵa jetse, basqa memleketterden ımport úshin 93,6%-dy kórsetti. Dál osy negizgi sheteldik jetkizýshilerdiń baǵasynyń ósýi eldegi shokolad ónimderiniń qymbattaýynyń basty faktory bolyp otyr.