Qazaqstan Densaýlyq saqtaý mınıstrligi túrki memleketteriniń jetekshi medısınalyq joǵary oqý oryndaryn birtutas jelilik ýnıversıtetke biriktirýdi usyndy. Vedomstvonyń jospary boıynsha, mundaı qurylym bolashaq dárigerlerge ortaq bilim berý baǵdarlamalaryn meńgerýge, al jas ǵalymdarǵa grant alyp, shetelde taǵylymdamadan ótýge múmkindik beredi, dep habarlaıdy infohub.kz saıty.
«Qazaqstan TMU elderiniń jetekshi medısınalyq joǵary oqý oryndaryn biriktiretin túrki memleketteriniń jelilik ýnıversıtetin qurýdy usyndy. Qoǵamdyq densaýlyq saqtaý, epıdemıologıa jáne bıoınformatıka salalarynda bilim berý baǵdarlamalaryn birlesip ázirleý kózdelip otyr», — dedi densaýlyq saqtaý mınıstri Aqmaral Álnazarova.
Birlesken bilim berý jobalaryn basqarý úshin Túrki memleketteri uıymynyń janynan arnaıy keńes qurý josparlanýda. Onyń jumysyndaǵy basty nazar qatysýshy elder arasyndaǵy tájirıbe almasýǵa aýdarylady.
Sonymen qatar jas ǵalymdarǵa, doktoranttarǵa jáne rezıdent-dárigerlerge arnalǵan granttyq baǵdarlama iske qosylyp, suranysqa ıe medısınalyq mamandyqtar boıynsha birlesken taǵylymdamalar damytylmaq. Basym baǵyttar qatarynda balalar kardıohırýrgıasy, transplantologıa, neırohırýrgıa jáne onkogematologıa ataldy.
Álnazarova qazaqstandyq ulttyq ǵylymı ortalyqtar men ýnıversıtettik klınıkalar TMU elderinen kelgen mamandardy praktıkalyq daıarlaýǵa alań bolýǵa daıyn ekenin atap ótti.
Jeke nazar qarapaıym emhanalar men ambýlatorıalarǵa, ásirese aýyldar men shekaralas eldi mekenderdegilerge aýdarylady. Qazaqstan aýyldyq jáne otbasylyq dárigerlerdi qysqa merzimdi taǵylymdamalarǵa jiberýdi, sondaı-aq olar úshin birlesken kóshpeli mektepter ashýdy usynyp otyr.
Mundaı tájirıbe almasý formaty jaqynda Ózbekstan, Tájikstan jáne Qyrǵyzstanda ótken Qazaqstan medısınasy kúnderi barysynda óz tıimdiligin dáleldedi.
Buǵan deıin «Kýrsıv» Qyrǵyzstandaǵy Qazaqstan medısınasy kúnderi aıasynda qazaqstandyq dárigerler Bishkekte áli týmaǵan nárestelerge qursaqishilik qan quıý boıynsha kúrdeli prosedýralar jasaǵanyn jazǵan bolatyn.