2025 jyldyń qorytyndysy boıynsha Qazaqstan postkeńestik elder arasynda túrmedegiler sany eń kóp azaıǵan memleket atandy, dep habarlaıdy infohub.kz saıty.
Qylmys jáne ádil sot saıasatyn zertteý ınstıtýtynyń mamandary 224 eldi qamtıtyn reıtıń ázirledi. Onda Qazaqstan 103-orynǵa ıe bolyp, 100 myń turǵynǵa shaqqandaǵy kórsetkish 184-ten 163-ke tómendedi.
Reıtıń sıpattamasynda «Birinshi oryndy burynǵydaı Salvador alyp otyr. Ondaǵy túrmedegiler sany bir jylda bir jarym esege derlik artyp, 100 myń turǵynǵa shaqqanda 1 086-dan 1 659 adamǵa jetti», — delingen. Ekinshi orynda Kýba (794), úshinshide Rýanda (620), tórtinshide Túrikmenstan (576). Besinshi orynda AQSh 542 kórsetkishpen. Eń az túrmedegiler sany Iemende tirkeldi — 100 myń turǵynǵa 14 adam.
Postkeńestik elder arasynda túrmedegiler sanynyń eń kóp ósýi Ázirbaıjanda (244-ten 264-ke) jáne Moldovada (236-dan 255-ke) baıqaldy. Zertteýde «Qazaqstanda túrmedegiler sanynyń eń kóp azaıýy tirkeldi — 184-ten 163-ke deıin», — dep atap ótilgen. Reıtıńte respýblıka Laos (102-oryn, 166 túrmedegi) men Botsvana (104-oryn, 161) arasynda ornalasqan.
Esepte túsindirilgendeı, túrmedegiler sany kórsetkishi 2025 jyldyń qorytyndysy boıynsha 100 myń turǵynǵa shaqqandaǵy bas bostandyǵynan aıyrý oryndaryndaǵy adamdar sany retinde esepteledi. Negizgi derekterden bólek, esepte tarıhı dınamıka, sotqa deıin kúzetpen ustalatyn adamdar sany, sondaı-aq bas bostandyǵynan aıyrý oryndaryndaǵy áıelder men kámeletke tolmaǵandar týraly aqparat bar. Zertteý BUU-ǵa múshe memleketter men erekshe mártebesi bar keıbir ákimshilik aýmaqtardy qamtıdy.