Qazaqstan Eýrazıalyq ekonomıkalyq odaq (EAEO) naryǵyna eksportty arttyrý úshin turmystyq tehnıka óndirisin aıtarlyqtaı ulǵaıtýdy josparlap otyr, dep habarlaıdy infohub.kz.
Qazaqstan Respýblıkasynyń ónerkásip jáne qurylys mınıstri Qanat Sharlapaev Májilistegi úkimet saǵatynda mashına jasaý salasynda 2024 jyldyń birinshi toqsanynda óndiris kólemi 24,9 paıyzǵa óskenin málimdedi.
Onyń aıtýynsha, 2025 jylǵa qaraı mynadaı kórsetkishter josparlanǵan: turmystyq tehnıka shyǵarý 360 myń danaǵa deıin ulǵaıtylady (onyń ishinde «Sılk Road Elektronıks» – 301 470 dana, «Almaty turmystyq tehnıka zaýyty» – 60 000 dana); jeńil avtomobılder 160 myń danaǵa deıin (JSHS «SaryarqaAvtoProm» – 110 myń, JSHS «Hónde Trans Qazaqstan» – 50 myń); jolaýshylar vagondary 100 danaǵa deıin (ZIKSTO); lokomotıvter 120 danaǵa deıin («Elektrovoz qurastyrý zaýyty» – 44 dana, «Lokomotıv qurastyrý zaýyty» – 90 dana); platformalar 500 danaǵa deıin (ZIKSTO); jartylaı vagondar 1,5 myń danaǵa deıin (KVK).
«Orta merzimdi perspektıvada salada Ekibastuzda temirjol klasterin odan ári damytý mindeti tur. Mundaǵy qoldanystaǵy óndiristerde temirjol kóligi men magıstraldyq temirjol joldaryna arnalǵan ónimniń barlyq derlik jelisi – usaq buıymdardan júk jartylaı vagondaryna deıin ıgerilgen», – dedi Q. Sharlapaev.
Mınıstrliktiń málimetinshe, klaster aıasyndaǵy jobalardy iske asyrý temirjol mashına jasaýda, atap aıtqanda, jolaýshylar vagondaryn óndirýdegi lokalızasıa deńgeıin 2030 jylǵa qaraı 50 paıyzǵa jetkizýge múmkindik beredi. Sonymen qatar, EAEO naryǵyndaǵy 9 mıllıon AQSh dollary kólemindegi tapshylyqty eskere otyryp, jańa ınvestorlardy, onyń ishinde qytaılyq HKC Korporeıshn jáne ońtústikkoreıalyq «Samsýng Elektronıks» kompanıalaryn tartý esebinen turmystyq tehnıka shyǵarýdy ulǵaıtý jumysy júrgizilýde. Bul kompanıalar Saran qalasyndaǵy qoldanystaǵy JSHS «Sılk Road Elektronıks» bazasynda 12 mıllıard teńge ınvestısıa salyp, qýattylyǵy 400 myń danaǵa deıin jetetin óndiris ornyn qurýdy josparlap otyr.