Qazaqstanda vızıt-ortalyqtardyń jumys isteýiniń biryńǵaı erejesi kúshine endi. Endi týrısik nysandar men marshrýttarda qaýip nemese shekteýler týyndaǵan jaǵdaıda, bul týraly aqparat alynǵan sátten bastap bir saǵattan keshiktirmeı týrıserge habarlanýy tıis, dep habarlaıdy infohub.kz.
Týrızm jáne sport mınıstrligi bekitken jańa talaptar shekteýler nemese qaýipter týraly málimetti vızıt-ortalyqtyń ózinde de, onyń resmı saıtynda da jedel túrde ornalastyrýdy kózdeıdi. Qujatta: «Týrısik nysandarǵa nemese marshrýttarǵa barý múmkindigine áser etetin jaǵdaılar týyndaǵan kezde tıisti aqparat vızıt-ortalyqta jáne onyń ınternet-resýrsynda alynǵan sátten bastap bir saǵattan keshiktirilmeı ornalastyrylýǵa tıis», — delingen.
Biryńǵaı standart vızıt-ortalyqtardyń qyzmetter tizbesi men jumys tártibin de retteıdi. Olar saıahatshylarǵa kórikti jerler, marshrýttar jáne óńirlerdiń týrısik áleýeti týraly ózekti málimetterdi usynýǵa, kelýshilerge keńes berýge jáne týrısik qyzmetter kórsetýge mindetti. Qyzmet kórsetý qazaq, orys jáne aǵylshyn tilderinde júzege asyrylady. Sonymen qatar, ortalyqtar múgedektigi bar adamdar jáne basqa da qozǵalysy shekteýli azamattar úshin kedergisiz orta qurýǵa tıis, al qyzmetkerlerge kásibı daıarlyq pen etıka normalaryn saqtaý talaptary qoıylady.
Vızıt-ortalyqtardyń jumys kestesi týrısik aǵyn men ornalasqan jerine baılanysty bolady — olar jyl boıy nemese maýsymdyq túrde jumys isteı alady. Ortalyqtardyń janynan meıramhanalar, dúkender, turý oryndary jáne basqa da servıstik ınfraqurylymdy ornalastyrýǵa ruqsat etiledi.
Týrızm jáne sport mınıstrliginiń pikirinshe, biryńǵaı erejeler búkil el boıynsha týrısik qyzmet sapasyn arttyryp, saıahatshylardyń ýaqtyly jáne durys aqparat alýyn qamtamasyz etip, Qazaqstan boıynsha saparlardy yńǵaıly ári qaýipsiz etedi.
Buǵan deıin «Kýrsıv» 1 tamyzdan bastap Qazaqstanda gıdter men ekskýrsovodtar úshin biryńǵaı erejeler engizilgenin habarlaǵan bolatyn. Endi olar tek eLicense.kz portalynda tirkelgen jáne salyq tóleıtin QR azamattary ǵana bola alady. Gıdter QR-kody bar arnaıy beıdjder taǵýǵa mindetti.